同樣一齣《賽德克•巴萊》，不同人看出不同層次。正如信仰彩虹的民族與信仰太陽的民族，因彼此信仰而分歧。《賽》刻畫的是人性的驕傲，還是醜陋？體會或許見仁見智，可是別忘了，原來觀眾看的是同一齣「年度激動之作」！
《賽德克•巴萊》上集《太陽旗》雖然17日才在港上映，但近年開始擔任電影監製的何超儀，早已率先慕名欣賞。她說：「若果唔係魏德聖導演將呢段台灣原住民歷史拍出嚟，香港人對台灣原住民嘅認識，來來去去咪張惠妹、張震嶽係原住民！但魏導唔只拍出原住民歷史，仲拍得好spiritual、好震撼、好激動，令我好驚喜！」
何超儀說的震撼，包括賽德克人的嗜殺。她說：「賽德克族認為『出草』（砍殺人頭）唔係殺人，而係祭祖靈。當砍頭變成天經地義，引發嘅後果就好嚴重。導演喺開場交代青年莫那魯道對另一族人話殺就殺，凸顯咗莫那同賽德克族嘅性格，對生命嘅概念。《太陽旗》尾段，賽德克族少年巴萬那威執起武器帶住同齡族人殺戮，搵到一班手無寸鐵日本婦孺，巴萬話：『你跟我們的祖靈到天上做朋友吧！』令我好深印象。巴萬自己都只係細路，但佢由細到大被灌輸出草祭祖靈嘅思想。但佢比上一代進步，至少仲覺得賽德克族同日本人係可以做朋友，雖然係要對方先上天堂。」
超儀認為《賽》片可令現代人反思：「戲中人物唔係一等一好人，而係本身都有性格缺陷嘅人。導演冇話戲中賽德克人、日本人係好定壞，人本身就係好中有壞，壞中有好，對照番現今社會，一樣有人為自己信仰而對其他人野蠻，程度唔比賽德克人斯文！電影可以令人反思，賽德克人係咪真係野蠻？現代人又係咪真係文明？」
文：影視組