熊黛林「封城」無限期 結婚先算！
熊黛林（Lynn）眼中的郭富城，既靚仔又Nice，幾乎全無點！縱然「富黛」已是人所共知的一對，但Lynn矢言絕不公開，即使結婚亦可能密冚。做天王的女人殊不容易！
我相信每個女孩子對愛情都有憧憬，細個我經常會幻想身邊出現白馬王子，仲話最遲要28歲結婚，不過人大咗就明白就算個男仔幾靚仔、條件幾好，但如果唔錫你、對你唔好都係冇用，你都唔會幸福。
對我嚟講，愛情嘅排位絕對先於事業，但唔代表我會為愛情而完全犧牲事業，我認為麵包同愛情缺一不可，如果冇事業，愛情可以有幾長久？我覺得要經營一段健康而長久嘅愛情，一定要有經濟基礎，尤其係男仔，如果想畀幸福個女仔，至少要對方食得飽、着得暖，間中可以扮吓靚，如果連溫飽都滿足唔到，試問可以有幾幸福？
六歲開始拖手仔
講到愛情，記得第一次有心跳嘅感覺，係發生喺學前班，當時我仲未夠六歲，嗰種係好單純嘅感情，只係對對方有好感，覺得呢個男仔幾唔錯，好鍾意同佢一齊玩，大家會拖吓手仔，好純真。
至於正式拍拖，要到20歲，可能算係比較遲，因為由細到大老師都會教我哋學生唔應該談戀愛，以免影響學業，所以我直到讀完書，做咗模特兒先拍拖。
我知大家對我同Aaron（郭富城）嘅關係好好奇，其實我第一次見佢並唔係合作拍MV，而係好多年前，我初入行喺上海為時裝騷擔任模特兒，我估佢應該唔記得，當時亦都唔會留意到我，因為佢係時裝騷嘅嘉賓，而我同佢隔得好遠，又有好多人喺佢身邊保護，完全冇得接觸，佢畀我第一個印象係真人好靚仔。
第二次見面，又係時裝騷，因為佢係大明星，經常做活動嘉賓。正式有機會傾偈接觸係做佢MV嘅女主角，我覺得佢好好人，好Nice。
恐被人「抽後腳」
之後見到好多報道，每年都話我攻城，其實乜嘢叫攻城？以前我會好介意呢啲報道，但依家唔會，唔通寫咗之後我就唔出街咩？你叫我喺屋企點算呀？
到咗依家，你問我有冇拍拖？幾時公開？老實講唔會有公開呢一日，唔會話手拖手出嚟講啲乜乜乜，至於結婚會唔會講？我真係唔知，到時先算，因為我怕講咗之後，會畀人抽後腳，會話我之前講大話，啲人唔會問之前點解唔講，而淨係會話你講大話。
口述：熊黛林
筆錄：名人組
服裝：Anteprima