JC教堂懺悔：好驚人憎我
混血女模Jessica C.（JC）慘受涉嫌盜竊案及疑似淫片事件雙重打擊，避開傳媒潛水32日後，昨日她在港出席主日崇拜，終首度面對傳媒，並接受本報獨家訪問，開腔剖白感受。JC承認曾為連串風波而情緒崩潰，直言到教堂求神寬恕，赦免罪過，又說感受到大家的支持及愛護，不會放棄香港巿場，希望官非可盡快解決。
「警鐘胸」JC早前禍不單行，先被指於去年7月在尖沙咀一銀行櫃員機順手牽羊取走一名女子遺下的600港元，被控涉嫌盜竊罪，其後JC遠赴台灣拍戲趁機避風頭，怎料又捲入疑似淫片事件，最後她自拍短片承認曾與初戀男友拍過類似片段，但不肯定流傳的淫片中的主角是否自己。
潛水32日的JC，日前已拍畢電影悄悄返港並即到警署報到，留港的她一直心繫美國家人，不時致電返美。前日及昨日JC亦有外出，但受負面新聞困擾的她似乎還未習慣面對大眾目光，連續兩日都選擇傍晚時分才露面，並以黑超及帽作遮掩，一直頭耷耷。
感受到愛與幸福
昨日約傍晚六時JC離開住所，頭戴Cap帽、穿格仔上衣及貼身褲的她，乘的士前往位於星街的天主教聖母聖衣堂參加崇拜，在45分鐘的崇拜中，JC與教友聽道及唱聖詩，完成崇拜後，JC走近聖母像，一臉虔誠地牽着聖母像的手，在心口畫十字低頭誠心祈禱。
當JC離開教堂見到記者時，雖表現愕然仍非常友善，並開腔接受本報獨家訪問，全程面帶笑容的她神情輕鬆。訪問完畢她還高舉V字手勢，希望讓愛護她的親友及粉絲知道她會堅強勇敢地走下去。
記：記者 JC：Jessica C.
記：你依家心情點？
JC：OK，已經平復咗好多，多謝關心。
記：你點解嚟教堂？
JC：其實我有時間就會嚟，因為我鍾意唱聖詩同祈禱，而且教堂畀我好peaceful（平和）嘅感覺。
記：你嚟教堂告解？
JC：好多人覺得嚟教堂係ask for forgiveness（求神寬恕），但對我嚟講更加係感恩，我好好彩同好幸福，真係覺得好多人錫我。
記：你係咪擔心連串風波會影響事業？
JC：我承認之前嘅事令我好擔心，好怕啲人唔知點睇自己，更加驚大家會好憎恨我，但係大家好支持我，包括我嘅家人、fans、同事，我感受到好多愛包圍住自己，好感恩，呢個一直係令我可以撐住嘅力量。
記：你係嚟求主寬恕同赦免罪過？
JC：人一定會做錯事，大大小小總有犯錯嘅時候。
記：傳你之前崩潰？
JC：係，因為太多事一次過發生，但依家已經冇事，好番晒，大家可以放心。
記：依家所有工作停晒？
JC：台灣電影已經拍完，過程好順利，同時喺台灣令我可以靜靜地一個人諗清楚自己嘅目標同方向。原來我好掛住香港，之前都唔知自己會咁掛住，所以我一定唔會放棄香港巿場。
記：官司方面點？
JC：現階段我唔可以講太多，只可以話好順利，12月會再去警署報到，希望12月可以盡快解決。
返美向家人交代
記：你有冇同家人聯絡？
JC：我今個月返美國同家人過感恩節，可以見到媽咪同兩個妹妹，我真係好掛住佢哋。其實今次返香港，我唔會接工作住，主要係想整理下同去警署報到。
記：去到美國點同家人交代？
JC：家人知道發生咩事，大家一直有通電話，佢哋都好愛我，同支持我。
之後JC搭的士回家，上車前表示最想快些見到家人。
採攝：追蹤組、文：名人組