唐貝詩自爆影蜜照 阿媽嚇破膽
自16歲學生o靚模Cammi的親熱照流出，隨即成為全城熱話，向來喜歡自拍並將相片上載網上的唐貝詩，揚言與男友在甜蜜階段時，亦會影親熱照，此番說話隨即嚇親媽咪寇鴻萍，惟有千叮萬囑女兒要用私人相機及小心保存照片。
昨日唐貝詩與林莉出席「apm潮裳聖誕華麗之旅」活動，唐貝詩透露近日在母親公司幫手打理業務，剛甩拖的她就表示現時是單身，笑言是因為母親不讓她拍拖。談到o靚模Cammi的親熱照流出？她認為每個人也有自由，並不否認拍拖時有拍過同類照片，她笑說：「咁好Sweet嗰陣錫吓嘅相都會有，（再進一步呢？）唔話你知，總之我自己就冇乜呢啲收藏，不過我覺得每個人都有唔同嘅喜好同私隱，最緊要係保存好，因為呢個係一份尊重。」
拍照要用私伙機
另外，唐貝詩媽咪寇鴻萍與任葆琳昨日出席另一活動，問到可有勸女兒別自拍照片上網？她說：「之前都有同佢哋講過，唔好上載啲私人相上網，就算好普通同男仔搭吓膊頭都唔好，費事畀人睇到有影響。（囡囡唐貝詩唔否認有同男仔影過親密相？）唔係啩，我已經提醒咗佢，就算真係影親密相都要用私人相機，要小心啲！」
而任葆琳表示近日投資七位數字搞高爾夫球運動服生意，並笑言現時是零感情生活，發現單身原來好開心，鍾意做乜都得唔使同人交代，亦不怕做剩女，因身邊好多朋友都係單身。
文：名人組