翠翠感動：我有存在價值
入行六個年頭的葉翠翠，今年首次拍攝監製戚其義的劇集，她亦感意外問監製何故找她，戚其義坦言是博一博，當時亦有不少反對聲音。葉翠翠感激監製給予機會：「第一次覺得自己有存在價值。」
今年拍攝劇集《4 In Love》，呢幾個月係我入行六年來，第一次覺得自己有存在價值，今次戲份多，角色人見人愛，自己好投入去做。工作人員、化妝、整頭都對我好好，大家有傾有講好開心。
聽人講同戚其義做嘢壓力好大，其實我乜都唔識，唔知道同佢拍嘢係有壓力，因為從來都未感受過。佢大小場口都會喺度，我成日都問佢拍成點？得唔得呀？佢話得。真係得？佢都答得。又會問佢點樣可以做戲做得好啲？佢話如果呢個角色嚟講已經合格，但要做一啲複雜角色就唔係咁，佢其實唔只教我點樣做戲，仲教我點樣做人，好似教我要了解對手嘅習慣係點，點樣迎合佢，大家合作先可以打成一片做到最好，佢唔會介意你係幾多線，好願意教後輩。
打醒精神做好本分
我都問過阿戚點解會搵我拍《4 In Love》，嗰日AA（製作統籌）打畀我搵我返去傾劇本，心諗都係客串啫，呢啲經驗試得多。阿戚話搵我都係博吓，想試吓用新面孔，佢話開會時有人反對搵我，覺得我咁多新聞都唔知係咪做嘢，但佢堅持用我，相信我唔係咁嘅人，我好感動。阿戚又話同我做過嘢嘅人都知道我認真，當時真係感動到想喊，有人真正去睇我，而唔係睇新聞去了解，佢都讚我有心機，但勸我新聞要好小心，只要做錯少少嘢人哋都會覺得唔係做嘢，可能咁啱肚痛，遲咗少少就會畀人話扮大牌，叫我要更加做好本分，呢啲嘢從來冇人同我講過，呢個機會亦係我呢幾年都未有過，好多謝佢、好多謝每位工作人員。
口述：葉翠翠
筆錄：影視組