黎明單挑小春起勢chok
天王黎明（Leon）將於下月舉行紅館個唱，新鮮熱辣加盟Amusic的陳小春率先預告會踩場做嘉賓，兩個大男人近日齊齊踩單車、跑步做運動，為個唱熱身。
繼本報早前率先披露小春加盟Amusic後，身為老闆的Leon跟小春愈走愈近，日前更飛起太太樂基兒，跟小春一齊踩單車、跑步。原來Leon早已邀請小春擔任演唱會的嘉賓，二人約埋做運動兼開會，見Leon一身運動裝跑步追上小春的單車練氣，更真人示範大玩單車高難度動作，連人帶單車一齊「chok」起離地，非常厲害！Leon說：「我哋唔係玩，其實本來係開會o架，係啱啱知道小春原來好鍾意單車，仲收埋好多架寶貝，佢又講到幾勁幾勁咁，所以我哋即興比試吓囉！」
做嘉賓霸住唱
Leon籌備多時的《LeonXu紅館演唱會2011》將於下月5日開鑼，小春誓要「新嚟新豬肉」，點都要去紅館踩場，Leon表示：「我好有誠意邀請佢教我跳舞，我自己舞功只係屬於初級BB班，今次要請教大師傅！」小春笑言不甘只做dancers，幾大都賴死唔走，要霸住個舞台唱番三五七首歌。
百分百工作狂
面對這位天王級老闆，小春說：「其實好多年前拍電影已經識，大家喺內地做騷都成日會碰面，不過天王喎，真係唔敢同佢講嘢！後來慢慢認識佢，發現Leon做事真係好認真，為咗做好一件事，佢各方面都想去兼顧，係百分百工作狂。」而Leon坦言跟小春簽約是一種緣分，希望好好合作，做出成績。此外，目前黎明身在紐約出席「第二屆紐約中國電影節」，大會並為其舉辦黎明影展，與當地觀眾交流。採訪：音樂組