阿Sa拉男友拍拖學英文
蔡卓妍（阿Sa）、陳偉霆（William）連同一班師弟妹昨日出席英皇創意學院的畢業禮，並跟學生分享心得。阿Sa透露自己正打算和男友William拍拖學英文，甜蜜到漏。
由英皇娛樂成立的英皇創意學院，目的希望為娛樂圈培育新秀，昨日學院舉行第一屆畢業典禮，並特地邀請校監楊受成和校長吳雨親臨頒發畢業證書，而阿Sa、William、泳兒、鍾舒漫、鄭希怡、林欣彤和洪卓立等一班師兄師姐就到場向學生分享經驗及心得，同時學院亦邀得樂易玲、甘國亮及倫永亮等撐場觀禮。
去完威尼斯發憤
身為師姐的阿Sa講到心得就謙稱愧不敢當，自言仍有很多事要學習，例如想抽時間上堂學好英文，因離開學校後就很少運用，她說：「自從去完威尼斯影展後，發現一做英文訪問就好緊張，於是返到香港就的起心肝想學好英文。」現正四出物色老師的阿Sa，透露男友William亦有意學英文，並希望兩人一齊進修：「依家William學緊國語，我哋都會一齊上堂，佢學得好快，加上之前返內地拍戲，國語進步咗好多。」
想探望燒傷歌迷
談到日前油麻地一所美容院火警，住在同幢大廈的一名Twins的女歌迷被嚴重燒傷，現時在醫院情況危殆，對此阿Sa表示：「我好想去探佢，但聽日就要離開香港，希望盡量抽時間，如果唔得都想拍條片或寫心意卡鼓勵佢。」
至於William則謂除跟女友拍拖上堂外，大家還經常一同做運動：「我哋會一齊上拳館，除咗打拳外，仲有玩跑步機及其他健身器材。」William又大讚女友注重飲食，所以體質很健康。談到他和阿Sa都是11月生日，William說：「要同佢夾吓期，我哋應該會出外食飯，但希望低調咁過。」 採訪：音樂組