Mandy Lieu整撻宴客食檸檬
名模Mandy Lieu專程遠赴巴黎取經，學煮地道法國菜。首次品嘗兔仔肝的她，更一試愛上。嚷着要大顯廚藝，為親友下廚並整兔仔肝撻，雖然慘遭拒絕，但卻無損她開餐廳、做大廚的心願。
名模Mandy Lieu早前到巴黎工作數天，並順道旅遊。向來對煮食有濃厚興趣的她，專程參與了地道的廚藝班，學煮正宗的法國菜！Mandy跟廚師Miss Lunch到附近的市場買食材。Mandy對當地的店主讚不絕口：「我哋嗰日想買魚同蝦，不過魚檔個老闆唔肯賣畀我哋！佢話過唔到佢自己嘅新鮮標準，真係好有性格！」
首吃動物內臟
後來Mandy與Miss Lunch決定以兔仔肝為材料，整兔仔肝撻。而二人一見如故，煮食期間雞啄唔斷，竟完全忘卻在焗爐內的兔仔肝撻，直至她們聞到一點燒焦的味道，才把撻拿出來，十分狼狽！Mandy更透露自己處女下海，首次吃動物內臟！她續說：「我一向都唔食內臟o架，不過覺得專程嚟到，乜嘢都要試吓！不過喺我處理兔仔肝嘅過程當中，我一直都皺住眉頭。不過其實佢係冇腥味o架，而且製成品仲好好味添！」
開餐廳做大廚
她笑言回港後曾邀請朋友到家中作客，可是每當提到會製作兔仔肝撻時，朋友們均耍手擰頭，令她大吃檸檬。但仍無損她的興致，並表示：「其實我好希望有朝一日可以開到自己嘅餐廳，而且係想親自下廚！所以我去每一個國家，都會去學煮嘢食，為將來鋪路！」
文：名人組