黃宗澤食死貓早知唔嘥錢
胡杏兒日前32歲生日，身為男友的黃宗澤（Bosco）卻冇影，壽星女更撒嬌指未收到禮物，然而Bosco昨日出席活動時，堅稱禮物只是未到手，對於杏兒表示非注重物質，Bosco即謂：「唔早啲講，等我唔使嘥錢！」
黃宗澤與楊秀惠昨日同以海盜造型出席活動，期間兩人互擲水彈，玩得不亦樂乎，不過身穿低胸吊帶襯超短裙的秀惠，被海風吹到「顧得上顧唔到下」，狼狽非常。
「女人真係反覆」
正忙於拍攝新片的Bosco，透露未有為女友胡杏兒慶祝生日，對於壽星女表示尚未收到生日禮物，Bosco謂：「係呀！啲嘢未寄到嚟。（好揼本？）唔好問，風吹雞蛋殼，財散人安樂，不過份禮物佢鍾意嘅，但我唔會講係咩，你自己問佢，女人真係反覆，提早講咗畀佢知，佢又話冇禮物。（佢話講心意，寫張卡都得！）早啲講嘛！唔使嘥錢。」談到杏兒生病，Bosco笑指也被對方傳染。
有指今年台慶視帝提名踢走王喜、林保怡等與無綫關係不佳的人，Bosco對此謂：「年年頒獎禮前都多風雨，習以為常，咁都要觀眾投票作準。（今年少啲對手？）都唔係，我對手太強，所以信心都係普通。」
秀惠唔講舊愛
一身性感打扮的秀惠，表示已做好防走光措施，對於陳美詩與朱慧敏發生車禍，秀惠坦言剛從馬來西亞返港，故暫不會打擾對方，好讓對方休息，更指望公司日後不會有類似事情發生，談到舊愛孫耀威為美詩公開向無綫開火，秀惠則謂：「都有睇，但其他嘢都係唔好講。」
文：影視組