葉翠翠：點解條命咁架？
葉翠翠步入三十歲「剩女」行列，感情仍未有着落。堪輿學家蘇民峰批命情路坎坷的葉翠翠，「真命天子」要等到2016，年屆36歲才出現。葉翠翠回顧過去三十載未覺有後悔的事，只遺憾姻緣未到，人生未免寂寞。
三十歲身體的確冇以前咁弗，好多時拍完通宵戲會攰三日。諗番過咗嘅三十年，人生都冇乜後悔，冇咩覺得未做，或做咗係覺得後悔，因為呢啲都係自己嘅過去，人生嘅一部分，依家過得好開心，遺憾可能係有啲寂寞，因為大部分時間都只係得自己、冇拍拖。搵到一個錫自己嘅人係幸運，但係我仲未搵到，會隨緣去等。
蘇民峰師傅講過我嘅命格係情路坎坷，師傅話點解你阿媽生到你條命咁o架？師傅所講係我嘅感情路，當時佢話要我等多六年，到時要好好把握，錯過咗可能要再等多十年，咁即係唔使等啦。我信師傅所講，但唔會好上心。師傅講得啱，我嘅感情生活又唔係順利，不過，我慣咗獨立，有啲女仔可能成日要人呵護，當然我都希望有人take care ，但情願寂寞一個人，都唔會亂拍拖。
對追求者失信心
上年遇到一個男仔，最初以為佢係好人，見佢對女朋友一心一意。後來佢同女朋友分開咗嚟追我，見佢對以前女友朋友好好，諗住可以交往，但了解多咗發現佢並唔係專一嘅人，發覺佢原來同女朋友仲未了斷，好彩發現得早、慶幸冇同佢一齊，亦因為呢件事對追求者失去信心，可能自己都有陰影。
蘇師傅話我2014年同2016年都會有姻緣，但係2014年嗰段結咗婚都會離婚，因為2016嗰個先係真命天子，叫我要好好把握，我希望搵到一個欣賞和了解我、接受我缺點嘅人，呢啲都要用時間去考證。以前都會刻意去街、同朋友飲嘢識吓男仔，但係依家冇去喇，2016年我都只係36歲，啱啱好趕上尾班車。
口述：葉翠翠 筆錄：影視組