祖兒玩鋪勁開騷剃光頭

容祖兒將於明年一月七日假澳門威尼斯人酒店舉行個唱，昨日她以黑色單肩露背短裙出席記招，大騷玉背及長腿，而其經理人霍汶希（Mani）亦有現身撐場，祖兒於台上公開感謝Mani多年來的幫助。

祖兒大爆Mani叫她剃光頭。	祖兒獲大會送贈足金大三巴。	祖兒開香檳慶祝明年一月在澳門開演唱會。

形容自己飛機場

祖兒表示明年個唱會於造型及歌曲編排上給大家驚喜，問到有何突破？她說：「Mani叫我剃光頭！佢叫我咁做一定有原因。」但在旁的Mani即搶說：「我講吓咋！」祖兒謂兒時曾留超短髮，並認為頭髮始終會再長出來，故不需要覺得可惜。

至於服裝上，祖兒表示會為個唱尋找靚衫，問到會否作性感打扮？她說：「都會，我有冇身材大家都想我性感，台上適當嘅性感我唔介意，最好嘅係我性感大家都唔會覺得難受，可能因為我形象都幾健康！」隨後她又以飛機場來形容自己。

提到有傳祖兒因杯葛叱咤而缺席記招，Mani說：「其實年尾撞咗好多電影同廣告，港台頒獎禮都撞咗演唱會。」並言尊重電台頒獎禮，但因誠信問題，故不能取消原先安排的活動。

千嬅或壓軸現身

問到祖兒會否擔心缺席頒獎禮而沒有獎項？她說：「冇辦法，係你嘅就係你嘅，觀眾唔會因為有獎而欣賞你，係電台嘅嘉許。」

至於好友填詞人黃偉文（Wyman）明年開騷仍未落實嘉賓，但一直都不請楊千嬅，問到祖兒會否覺得Wyman落對方面？祖兒說：「唔知，唔關我事唔講咁多好啲，可能壓軸出現呢。」

Wyman前晚現身張敬軒個唱，他否認與千嬅互爆粗的傳聞，並直認近五年少與千嬅聯絡，見面時是點頭之交。

文：音樂組