學友留秘笈護愛女
張學友昨日接受鄧藹霖電台節目訪問，坦言自從做了父親後，因想陪女兒長大，所以很少拍戲，連夜蒲都戒了10幾年，被主持笑他只剩老婆羅美薇一個朋友，學友笑說：「老婆都成日叫我partner。（佢係你靈魂伴侶？）未去到咁深入，但生活上互相依賴。」
盼女兒有獨立空間
結婚15年，學友坦言性格跟老婆唔同：「我份人冇乜所謂，但佢就好緊張，對所有嘢都有要求，係完美主義，我哋最多唔同意見係教細路，太太鍾意佢哋寫功課工整，我就覺得寫得靚唔靚係審美問題，我都同太太講，你要搵啲自己鍾意做嘅嘢，唔好日日對住細路。」
擁有2個女兒的學友，承認跟老婆都是緊張派父母：「依家細女仲有帶私家碗碟，唔係怕細菌，而係太太睇好多刊物，知道邊啲膠安全，鍍銀食器有冇問題，我哋想保護小朋友嘅心好強烈，唔想有行差踏錯。」身為歌神的學友，不希望女兒視他為天王巨星：「我已經50歲，唔知幾時死，好驚教唔晒啲嘢畀個女，諗過寫書、錄低或講畀佢哋聽，呢樣嘢好急想做。」
文：音樂組