美詩頸部郁得上街透氣
無綫藝員陳美詩（Macy）早前在日本拍攝節目發生意外，作為男友的孫耀威（Eric）連日來鬧爆無綫中人處理不當，昨日他以電話接受查小欣訪問，指Macy出事時以為自己會死，在車被困時隻腳一直踩住煞掣，去到醫院才致電他報平安。此行本來男女要同房，Eric覺得好可笑，認為此舉是不尊重藝人。
微博留言謝關心
不過Eric感激陳志雲幫手，令Macy得以順利返港，他說：「本來佢哋冇機位，因為佢哋張平價機票冇得改，多謝陳志雲幫手，其實有人做到嘢，只係冇人通知佢哋。」他發炮鬧無綫可會令Macy感為難？他說：「我冇諗咁多，只希望各方面畀壓力，等佢哋盡快返港。（你與Macy可擔心被有關人士封殺？）我同佢嘅角色好被動，只係想講出來，希望有人關注，否則永遠冇人知道有咁嘅事發生過。」
連日來在家休養的Macy昨午在微博留言感謝大家關心，並透露頸部情況已經好轉，能轉動自如，待會去看醫生，順道透透氣。而Eric之後也在微博留言：「也是時候忘記過去展望將來。」
黃宗澤問責遲啲
黃宗澤前晚出席活動時，對Macy車禍受傷TVB被指刻薄一事表示：「有時去啲落後地方，居住環境唔太好，但為咗拍攝無辦法，不過未試過要男女同房。（公司準備不足？）可能溝通上出問題，依家最緊要係快啲康復，事後問責遲啲先算。」而問到有傳女友胡杏兒是內定視后，他說：「邊有得攞硬，今年粉絲投票都好重要，我對佢有寄望自己反而機會不大。」
文：音樂組