黃宗澤：要癢幾時都可以
「七年之癢」的魔咒困擾天下情侶，當年拍攝《我的野蠻奶奶》撻着的黃宗澤（Bosco）與胡杏兒轉眼七年，「姊弟戀」起跑時被外間狠批中途退出，但實情卻細水長流愈跑愈有。愛情、事業兩得意的黃宗澤，坦言未有結婚計劃，步入「掟煲」高峰期，黃宗澤不痕不癢。一連五日，黃宗澤分享他生命中的愛情、親情、友情……。
感情事向來都希望低調處理，保持依家嘅狀態，感覺幾好，始終係兩個人嘅事，唔想講得太白。
從來冇擔心過七年之癢嘅問題，自己冇呢個概念，講真要癢幾時都可以癢，唔使等到七年先嚟癢，對住緋聞就頭痕，哈哈！但係緋聞就冇得避免嘅，好多時睇完得啖笑，依家都慣咗開劇就有緋聞，好似《潛行狙擊》出街就同徐子珊傳囉。好彩我嘅性格豁達，其實只要你唔睇重件事嘅話，啲嘢就冇辦法撩(興)你。我只着緊自己嘅工作。
結婚係一念之間
有人話到某個階段就要結婚嚟維繫一段感情，其實兩個人過得開心，唔需要刻意維繫，你睇梁朝偉同劉嘉玲拍拖幾耐，都係近期先結婚。我自己覺得結婚好講時機，可能係突然間一個念頭，現在大家都畀到空間大家，唔識點講，總之舒服，或者可以話係大家都唔會對對方有要求。
呢一刻冇計劃結婚，以前細個希望三十歲結婚，但依家到咗三十歲又覺得冇乜嘢，自己太多嘢想做。結婚生仔要有好好嘅打算，好似自己對住屋要求好高，dream house想住penthouse，好貴架，自己又有少少潔癖，想搞到屋企好靚。
以苗僑偉為榜樣
對將來家庭生活都有一幅幅藍圖，希望好似三哥（苗僑偉）咁，結咗婚，有仔、有女、有生意，間中拍劇過吓戲癮，遊戲人間。生得仔就要畀時間照顧佢，起碼要有能力幾個月唔做嘢湊仔，但係做呢行咁耐，好相信際遇呢樣嘢，時間係冇得預設嘅，假如冇人搵我拍戲，我點努力、點搏命都係冇用。
正所謂三十而立，自己一路都有分散投資，好似買金、買樓、買藍籌，穩穩陣陣唔使打理嘛。阿媽又就嚟退休，所以打本開咗間眼鏡舖，等佢退休之後有啲細藝。
馬國開最大餐廳
一直想喺香港開食肆，但係香港舖租實在太驚人，所以揀咗喺馬來西亞怡保同朋友夾份開餐廳，都係送埋畀阿媽，自己間中就去睇吓。餐廳會有Live band，投資七位數字左右，依家裝修緊，應該係全馬來西亞最大嘅餐廳，成八千幾呎，平租吖嘛，哈哈，舊錢喺香港都唔知租唔租到三百呎。
口述：黃宗澤 筆錄：影視組
服裝：Hugo Boss
場地：EL CID 西班牙餐廳