妙芝周國豐帶仔盡興
徐子淇為愛兒李俊熹的「迎新」派對邀請了眾多嘉賓出席，包括名模歐陽妙芝及其兩名兒子、明肇豐一家、周國豐夫婦及兒子、莎莎太子女郭詩慧、陳君宜與老公、楊諾思等。開P後陳君宜透露：「幾好玩，不過主要畀細路玩，入面好多表演，好精彩，不過自己冇咩機會睇，主要同朋友傾偈。（買咗咩禮物？）冇買到，徐子淇主張叫我哋捐錢多過買禮物，有見到BB，但瞓咗。」
歐陽妙芝說：「兩個仔玩得好開心，因為佢哋未見過踩高蹺表演，在場魔術師會玩互動，同阿仔變波波。」另一嘉賓張崇基則表示玩得好開心：「現場有一條黃色蛇，第一次摸。好多小朋友都好開心，好多表演同體操睇，似遊樂場咁，今次係第二次嚟派對，佢哋好有心，仲整咗一家五口Video，好溫馨。BB瞓咗，好得意。（同子淇好熟？）同佢老公熟啲，未結婚已經識。」明肇豐亦透露入面幾大陣仗：「兩個小朋友玩到捉唔住，每個角落都有活動，例如咖啡杯。仲有唔同種類嘅蛇，可放上身，好精彩，搞到我神經錯亂跟唔上，又有糖、朱古力食，好多小朋友搶薯條。」
