曼玉澄清冇送禮保男友聲譽
國際影星張曼玉前晚現身時裝活動時，心情明顯不俗。期間她更主動提及有關與男友Ole Scheeren分手後為情消瘦的傳聞，她說：「同男友一齊唔一齊係自己事。」她更指一直以來的報道對男友不公平，她澄清冇送對方名錶及名車，而拍拖5年來，男友冇戴錶亦冇揸車！
久未在港公開露面的張曼玉（Maggie），前晚出席Burberry新店開張活動，同場還有歌手楊千嬅、名模Ana R.、Jocelyn及姚予晴等。身穿裸色長裙的Maggie心情不俗，還透露自己只回港數天，但會跟家人和朋友見面。問到是否消瘦了？Maggie即否認：「冇呀，十幾年嚟都係差唔多。」她又笑言：「你哋每見我一次，就話瘦一次，依家我應該得番棚骨啦！（有傳話你同Ole分手所以瘦咗？）係呀，你哋一講呢啲（分手）就話我瘦。（生活開心？）一直都幾開心。」
對報道唔開心
此時，公關欲拉住Maggie進場，但Maggie主動留下來繼續接受訪問，還表示自己有事情要澄清，她說：「對於傳聞，我同男友一齊唔一齊係自己事，唔想解釋太多，但傳媒有時寫得太唔公平，講我買錶買名車畀佢，但我同男友5年嚟，佢冇戴錶亦冇揸車！我亦冇能力做呢啲嘢，咁講對人名譽好差，我覺得呢樣嘢一定要澄清，亦係唯一要澄清，否則唔公平，呢啲報道冇證冇據。（男友唔開心？）係我唔開心，做我朋友冇理由承受呢啲嘢。」可見Maggie十分維護男友！
千嬅難捨子丹
而同場的千嬅透露最近有套跟甄子丹合作的電影原本要開拍，但現在延期到明年年初，故有可能因為檔期遷就不到而推掉，她說：「唔知拍唔拍到，都有啲可惜，因為自己好期待同甄子丹合作；不過另一方面覺得開心，因為我下個月要做音樂會，依家有機會休息吓。」至於會否延遲造人計劃？千嬅則表示一切隨緣。
文：名人組