鍾一憲 麥貝夷鬼咁有默契

憑合唱歌《勾手指尾》人氣急升的鍾一憲（Jason）及麥貝夷（Karene），趁萬聖節將至齊齊扮鬼扮馬。向來膽小的Karene透露，早前到主題公園的鬼屋探險時被「鬼」追，嚇得她「雞咁腳」逃走，她說：「我喺斜路起勢跑，搞到仆親，連條褲都仆穿埋！」至於Jason自爆曾參加萬聖節脫衣派對，還遭滿身汗的「麻甩佬」狂磨，他說：「啲人跳跳吓舞突然除晒衫，得番內衣褲，有男有女o架！不過得啲成身汗嘅男人係咁黐埋嚟，仲邊跳邊食煙，好有『味』力囉。」

見鬼嚇到癲

萬聖節猛鬼出籠，Jason憶述一次異國驚「魂」，他說：「早前去咗個中東國家，一入房已經覺得周身唔聚財，點知夜晚就畀鬼『責』，之後仲見到張被凌空飛起。」本欲沖涼冷靜心靈的他，豈料愈沖愈見鬼：「諗住沖完涼再瞓，點知瞓瞓吓見到兩個中東男人喺門口睥住我，部iPad仲自動播歌，真係嚇到癲。」

麥貝夷被「鬼」追嚇到係咁走，最後仆親連條褲都穿埋。	鍾一憲、麥貝夷整古做怪。	鍾一憲、麥貝夷在萬聖節會開P狂歡。

自認被嚇狂

此外，Jason與Karene稍後將出席公司的萬聖節P，自認有「被嚇狂」的Jason，希望屆時以清朝的殭屍look現身：「我好鍾意殭屍，最好成身血兼面青青。」而Karene則笑言要扮紙紮公仔襯番對方，果然默契十足。

文：阿彭

化妝：Terrence C

髮型：morris@O4

場地：新世紀廣場