Ice鬼話連篇嚇窒Elke
誰說萬聖節一定要扮到血腥核突？o靚模Elke及Ice化身性感俏護士湊熱鬧，兩女拿着道具針筒及手術刀「互相廝殺」，認真兇殘！Ice自認夠勇，經常整蠱細膽的Elke，試過狂講鬼古令對方唔敢瞓！
o靚模組合冬甩成員Elke（陳芷敏）及Ice（周梓盈）趁萬聖節將至玩變裝，穿上制服化身性感俏護士，勢令男粉絲神魂顛倒。本以為兩女嬌俏可人，豈料卻是「兇殘」女護！Elke拿起超大針筒瞄準Ice屁股，Ice立即還擊，以巨型手術刀幫Elke「開刀」，但其實搞笑多於殘忍。
不敢獨留房間
Elke自認細膽乜都驚一餐，因此常被貪玩的Ice整蠱。早前兩女上郵輪過夜工作，Elke就被嚇得冇覺好瞓。她說：「我同Ice同房，夜晚佢同我狂講鬼古，之後竟然出咗去玩，嚇到我唔敢一個人留喺房，要搵師姐Rainbow傾通宵。」相反Ice則膽大包天，每年萬聖節遊鬼屋都搶先入閘完全唔驚，更會反嚇扮鬼的演員。
提到萬聖節有何難忘事，曾學特技化妝的Ice去年與友人親手化上爛面及爛手妝，卻因太逼真而被驅逐。她說：「我哋去玩鬼屋竟然被勸喻離開，話我哋血肉模糊，扮相仲恐怖過現場啲『鬼』。」Ice直言今年想跟其他冬甩好姊妹到蘭桂坊開派對，希望以誇張造型示人。
想做白衣天使
兩女異口同聲表示兒時曾幻想當護士，Elke自稱讀書時理科成績不錯，但因怕血而放棄。Ice則自嘲記性不佳：「我唔驚血，但記唔到啲專門用詞，應該拮人好多針都抽唔到血！」
文：立影 攝：林楠
場地：恒豐酒店紅煙窗餐廳
服裝：100Feel Party制服店