陳慧琳呃仔冇錢自食其力
靚媽陳慧琳（Kelly）前晚於活動上，提到為訓練乖仔將來自食其力，寧願暗藏富貴亦拒絕向蝦餃仔透露身家，Kelly笑言若囝囝懷疑「真相」，會以「充o架咋」作解釋，引得哄堂大笑。
Kelly前晚與名模諸葛紫岐、馬詩慧等出席名牌旗艦店開幕活動，向來熱心公益的Kelly與品牌聯手合作設計限量版手袋，而部分收益將撥捐「陳慧琳兒童助學基金」。問到Kelly會否將善心延續，將蝦餃仔身家行善？她說：「遲啲先，依家佢唔明都冇用，佢得好少錢咋，得兩年利是錢同埋嫲嫲、公公送嘅金條，大概10條左右，放喺夾萬。」
諸葛孕味指水腫
Kelly表示不會讓囝囝知有多少身家，好讓蝦餃仔自食其力，她說：「同佢講屋企冇錢o架，要努力賺錢養媽媽，（平日會見到喎？）話佢知充o架咋！」Kelly自認並非怪獸家長，得知巿面出現「特首班」，Kelly驚訝說：「吓！唔好搞政治啦，阿媽唔識呢啲嘢，幫唔到。」
此外，同場的諸葛紫岐臉圓圓出現被懷疑有喜，更表示會向Kelly請教生B之道，Kelly即言：「我都唔叻o架，問徐子淇啦，生完仲咁靚，我都要問佢，（學佢生三個？）唔好搞喇，冇佢咁叻。」而明年將與男友Neway太子爺薛嘉麟擺酒的諸葛，解釋「孕味」只因感冒水腫，但全程含糊否認是否懷孕說：「之前都有親戚（月經）嚟嘅！」
採訪：音樂組