父母離異 心存遺憾 容祖兒：不再有恨

在我小時候父母已醞釀分開，所以我好細個就明白不開心就不好勉強，我15歲那年父母正式離婚，對我成長都好大影響，夜闌人靜總會感到遺憾，始終覺得父女緣真係比較淺。

我記得楊生（楊受成）同我講過，一世人所有事都有得揀，但有兩樣嘢冇得揀，就是你阿爸同你阿媽。我曾經都嬲過佢（父親），但叫自己唔好囉，因為是這兩個人帶我來世界，但你要好歡欣面對住佢，我又未必做得到，但我心裏面已經冇恨。我同佢好少聯絡，但細佬會同佢食飯，會將佢的近況話我知，並非我不恨見佢，而是佢都建立了自己的家庭，都要擺好多時間去照顧佢新太太及仔女。

祖兒坦言母親是她一生最重要的人。	對於父親，祖兒心裏已沒有恨。	祖兒外表成熟淡定，內心卻十足大細路。

媽咪地位無可取代

正因為父親的關係，我同媽咪感情係好好，但都要經營，由細到大媽咪擺了好多心機在我身上，相對地佢對我的要求亦會多，我希望佢明白，雖然人愈大認識的朋友愈多，但不代表佢在我心目中的地位或重要性減少，佢所做的一切沒有人可以取代到，即使有半點誤會我都不希望，而媽咪是屬於一個多愁善感的人，佢會諗好多諗到鑽牛角尖，都不肯選擇同我講，因為佢怕煩到我，我好希望佢不要將問題放在心上，我哋係血脈相連，但始終我不是佢，所以就要去溝通。

不願分享內心世界

因為屋企的影響，我細個不會想給人知父母離婚，因為個個朋友都有個好幸福、健康的家庭，但自己就好似有些殘缺、不健康，所以我從不喜歡向人透露內心世界。在同學、朋友眼中我是一個獨行俠，可能是欠缺安全感，覺得秘密永遠都是秘密，內心感受我寧願選擇不同人分享。

後記：童心未泯

今年31歲的祖兒思想成熟，外表淡定，其實她說話、舉手投足都充滿童真，專訪開始時，祖兒跟筆者傾談噏邊個話題先，大家互相推讓，她即刻提議用包剪揼解決，隨即口中唸唸有詞：「1.2.3……1.2.3……」結果筆者輸了，祖兒哈哈大笑：「你輸咗你講先！」成個大細路現形。

口述：容祖兒

筆錄：音樂組