陳煒簽證到期返港避難
曼谷水災嚴重，早年結婚移居當地的前亞姐陳煒，前晚避走返港，她解釋是趕返港辦泰國居留的簽證，不過，有見「家鄉」災情嚴峻，河水倒灌可能將整個曼谷淹沉，昨日受訪時，陳煒不禁流露擔憂之情並說：「我都驚今次唔知返唔返到去！」
陳煒（煒哥）與台灣商人顏志行結婚後，一年多前隨夫公幹移居曼谷，對當地居住環境相當喜愛的煒哥，就最近水災蔓延，淹浸巿中心甚至波及唐人街、王宮等地，表現得很擔心。前晚煒哥為了趕返港辦理居留泰國的簽證，無辦法才「撤離」她心愛的曼谷。煒哥說曼谷機場亦見冷清，她說：「可能因水災冇旅行團嚟，我反而見內陸機場嗰邊就人頭湧湧，好多人揀去內陸其他地方暫避。」
家住九樓冇影響
「避走」返港的煒哥解釋：「我個簽證到期，我驚因為水浸最後連機場都封埋我返唔到香港續期，泰國告我逾期居留咪弊！所以我惟有返嚟，仲要提早一日返，因為訂到機票就唔想再等。」目前煒哥在曼谷的住所是九樓，基本上水浸是影響不到，不過，走到街上見到很多人擠滿超巿內搶購糧食、水與及日用品時，她都被嚇一跳。問她可有搶埋一份？她說：「冇呀！我老公又成日周圍飛，得我一個食得幾多吖！而我屋企又有濾水器，只需儲夠水用就得，反而我養咗四隻貓，我要買定多幾包貓糧以備不時之需！」
文：影視組
攝：劉智源