基仔賺夠老婆本揀啱賢內助
古巨基新碟大賣昨日舉行祝捷會，訪問時冧笑默認緋聞女友助手Lorraine「賢內助」身份，向來醉心設計的基仔更透露會為「未來老婆」炮製獨一無二的嫁衣，認真sweet到漏。
基仔昨日為新碟《Amazing World》榮獲雙白金舉行祝捷會，最近與歌手周永恒鬧出是非的無綫音樂總監鄧智偉，及無綫高層樂易玲齊齊到場支持。
親自設計婚紗
早前基仔剛去完韓國音樂節即轉到大陸開騷賺人仔，笑他是否搵老婆本？基仔說：「唔做呢單都夠。（雜誌話Lorraine同你04年喺斐濟群島秘婚，佢密密投資，依家你身家已過億？）冇計過有幾多。（夠老婆本？）吓，要一億咩？身邊冇投資叻嘅朋友，工作上佢係好幫手。（滿意呢位賢內助？）各方面都係好幫手。」不過基仔詐傻扮懵說中文差唔明「賢內助」何解，又笑認賢內助等於好幫手，但他承諾結婚一定公告天下：「未必大排筵席，鍾意簡單啲。（同Lorraine傾咗？佢係好幫手嘛？）未呀。」那他會否為另一半設計婚戒？基仔說：「戒指咁簡單？將來我嘅新娘一定係着住我設計嘅婚紗。」
祝JC快痊愈
早前為基仔擔任個唱嘉賓的模特兒Jessica C.備受慾照事件困擾，基仔自報道得知消息：「戥佢好慘，女仔畀人咁樣出賣，希望佢快啲喺傷口中痊愈，投入工作。」基仔又呼籲年輕人應避免拍攝此類照片，即使拍拖亦應適當保護自己：「自己影過最親密都係搭膊頭、面貼面。（同fans影都搭膊頭啦。）用力同唔用力嘛，唧晒啲手汗出嚟！」
文：音樂組