阿Sa：冇嘢再傷害到我

【龔凱欣北京直擊】阿Sa與古天樂前晚現身北京，出席I.T旗下品牌Maison Martin Margiela旗艦店開幕酒會，老闆沈嘉偉有來撐場。

北京現時氣溫只有攝氏五、六度，阿Sa着上全新秋冬毛毛裝到場，自爆極度怕凍，身上已貼了六個暖包，置身室內，熱到出晒汗，她說：「頭先喺車上面，有啲抖唔到氣，想死！出到外面就啱啱好。」

I.T旗下品牌MMM旗艦店北京開幕，模特兒魚貫行騷。	古天樂、阿Sa、沈嘉偉在北京坐在第一行睇騷。	阿Sa與鄭中基由秘婚到離婚，事件令她急速成長。

入行十年現最free

阿Sa繼又表示十分忙碌：「下個月喺上海開巡迴演唱會，之前喺廣州同美加都開咗，下年仲做緊，3月會喺中山，中間仲傾緊一啲地方。另外又要錄廣東碟同綵排演唱會。」

問到今次新碟會走甚麼路線？阿Sa說：「係講freedom。因為我同阿嬌入行十年，呢一兩年過得最free、最開心。自己經歷咗一啲嘢，最差嘅都經歷過，冇乜可以再差。所以依家好開心，因為已經冇嘢可以傷害到我。加上之前試過同阿嬌分開出碟，識到唔同嘅音樂人，可以互相介紹。」

讚男友陳偉霆成熟

阿Sa透露現在思想成熟不少，她說：「以前唔夠大，成日諗好多，想自己成熟啲。依家成熟咗，反而要返老還童。（William同你一齊返老還童？）佢細過我嘅喎，不過佢某啲方面好成熟，好多嘢會交畀佢諗。（例如呢？）好難講，要有啲嘢發生先。（係咪好多人搵你哋情侶檔？）有啲。不過無論對外定係對公司都講過，我哋兩個人都唔係咁想，有幾個廣告一齊拍，都係未一齊之前已經簽落嘅。」另外，阿Sa有份拍的大陸劇日內在意大利播映，她在微博表示覺得很榮幸。