城城開騷唔使Lynn幫手換衫
郭富城明日46歲生日，昨日可說「雙喜臨門」，宣布12月個唱加開四場，初嘗除夕演唱滋味，但他拒絕訓練緋聞女友Lynn（熊黛林）幫他台下寬衣。
城城於12月18日在紅館舉行十場演唱會，昨日在記者會宣布加開28至31日共14場，適逢明日是城城46歲牛一，他心情超靚，主辦商張耀榮送上「雙封」大利是，並公布優先訂票首日已過千萬票房，難怪城城「四萬」咁口。
門票反應理想城城卻自稱遭「cut飛」，他承認Lynn及朋友都有託他訂飛，無奈他也話不了事，交由助手處理。記者笑言可安排Lynn幫他在台下換衫便不用飛，他說：「我咁多年做騷已經有兩位dressing，佢哋要特別訓練，今次個台好複雜，台底啲通道比以往迂迴好多。」
生日唔會二人世界
生日可與Lynn過二人世界？城城笑言：「唔係咁鍾意二人世界。」他會與好友張智霖、沈嘉偉食飯。約定Lynn等她有時間扮靚？他抵死說：「晏啲諗諗，我知你哋好關心我嘅！」生日願望是否拉埋天窗？他即甜笑不答。
至於早前透露的凌空舞蹈，城城已在鍛煉中，又說會請韓國排舞師，會否是Rain的排舞師？他即說賣個關子：「有機會嘅，知己知彼嘛。」對懷疑有空姐偷拍城城機上瞓覺相並放上微博，他說相信報道後，航空公司內部都會檢討，雖然對方行為有少少不對，但未必一定是空姐所為。
文：音樂組