林海峰末日預告陪草蜢上路
林海峰（Jan）一連六場紅館Talk Show前晚圓滿結束，楊千嬅、丁子高和陳志雲專程捧場。而Jan以肢體語言向台下太太彭羚和兩位女兒作「無言感激」，並感謝好友草蜢和葛民輝做足六場嘉賓，扮鬼扮馬勁歌熱舞搞氣氛．並爆蔡一傑向他提議開「草蜢軟硬演唱會」。至於好拍檔阿葛，Jan笑言：「佢好離奇，叫佢實會話得，唔會問做乜，又冇要求，有個咁嘅朋友搞到我好驚！上次佢做高山青龍Rock Star，點知就演繹咗個心臟病發嘅歌手！」
阿葛被嘲逼爆衫
台上Jan更揚言明年10月21日盛傳是世界末日，他決定Book期在當日開「是但飲，求其吹」。事後Jan笑言：「表演是但飲水，同求其吹嗩吶。（之後個台交畀太太彭羚做復出演唱？）呢個Rundown都唔差喎。」至於軟硬與草蜢開騷，Jan笑謂：「上次諗住軟硬同達明開騷，點知搞到唔見咗達明，我怕今次會整唔見咗草蜢，你問傑仔博唔博，博就陪佢上路。」在旁阿葛即謂：「我就送佢一程。」對Jan的說話，草蜢三子表示一於奉陪到底。至於傑仔的Deep-V造型大騷胸腹肌肉，阿智則抵死指Deep-V原本是葛民輝所穿，因遭阿葛逼爆才變Deep-V。
文：音樂組