林莉自嫌太乖 Alice B.後悔吸毒

一生中有沒有做過曾經令你後悔的事？這個問題確實發人深省，混血女模Alice B.最後悔小時因家貧而犯偷竊，更自爆曾誤入歧途吸毒！模特兒林莉後悔的卻是小時無玩過，缺少了人生閱歷。玩與不玩，孰好孰壞，認真見仁見智。

林莉「我好後悔細個嗰陣冇玩多啲！因為我係一個悶蛋，冇乜拍拖，又冇乜出去玩。依家識咗啲朋友，發現佢哋都有好多經歷！以前放假就留喺屋企煮吓嘢食、做吓家務，又或者參加吓興趣班。不過依家都追唔番，過咗嗰個階段，心態都唔同咗啦。」

趙哲妤「我好後悔自己細個冇學琴！其實以前媽咪有叫我學，但係我因為家姐學咗，我想學同佢唔同嘅嘢，所以揀咗學畫畫。結果喺我選中國小姐做才藝表演嗰陣，就諗如果有學琴就好！我依家都自學鋼琴中。」

徐靖雯「讀書那時很喜歡一個男生，當時很想告訴他，但沒勇氣。畢業後就沒有聯繫了，現在還是會想，如果當時剖白了可能會有發展機會。所以我現在常常提醒自己要勇敢一點！」

Alice B.「其實我人生入面有４年都好後悔，嗰時好細個，屋企又出現問題，嗰陣試過喺啲舖頭偷糖食，大個啲仲曾經吸過毒品！好彩冇畀警察拉。不過呢啲已經過去咗，我從錯誤中學習，一定唔會再重犯以前嘅錯。」

官恩娜「我好後悔以前嫲嫲在生時冇乜陪佢，所以依家同婆婆搬埋一齊住，希望陪佢多啲，仲深深明白『家有一老，如有一寶』嘅道理。」

黃伊汶「細個爸爸成日唔喺屋企，之後我去咗外國讀書，放假都好少返香港；到依家做嘢，又忙到冇時間陪屋企人。所以依家一有機會，我就會同屋企人一齊過，珍惜喺一齊嘅時光。」

羽翹「有個親戚去咗美國好多年，後來患咗癌症，之前佢曾經話好想要我隻新CD，原本講好9月拎畀佢，結果佢未等到就走咗。好後悔以前咁少探佢，但估唔到世上原來有人咁期待我隻碟。」

徐淑敏「細個好乖，最多試過默書唔合格，假冒媽咪個簽名囉，因為媽咪個簽名好易簽，我都係跟家姐咁做。」