鍾一憲生日收吻興合合
樂壇新人鍾一憲早前於生日前夕與一眾粉絲相聚，熱爆燒烤場，度過他的23歲生辰。而他的好拍檔麥貝夷亦送上香吻，令壽星仔更加「紅粉緋緋」！自言度過最難忘生日的他於派對上更忍不住感動落淚，場面感人。
與麥貝夷（Karene）憑一曲《勾手指尾》爆紅的鍾一憲（Jason）早前與一眾fans共度生日，錫到佢燶的粉絲們除了密密燒嘢食「取悅」Jason外，更齊齊送上賀禮及生日驚喜，勢令他有個難忘的生日派對！首次與逾百粉絲過生日令Jason特別難忘，就連三、四歲的小朋友亦為他賀壽，他說：「上年啱啱出道冇人識，亦冇自信，只有20個fans同我一齊過，今年有咁多人，我真係好感動！」為了留作紀念，粉絲們為他錄製影片，不過Jason卻忍不住落淚，嚇得他們不知所措，他事後笑言：「講感想時我諗番起以前，其實我16歲已經簽咗第一間公司，到七年後嘅今日先算有啲成績。」
收幸運手機號碼
Jason透露粉絲送他的禮物逼爆了他家的露台，拆禮物拆到佢手軟，他說：「有個風水師朋友覺得我個電話號碼同我命格唔夾，所以特登去買另外一個旺我嘅號碼，真係好有心思o架！」由於他的粉絲知道偶像喜歡作鬼馬打扮，故不約而同為他送上造型可愛有趣的煲呔，成功為他打造了「煲呔鍾」的形象。
生日少不免談及願望，身為歌手的Jason除了希望不久將來能舉辦一場小型音樂會及出個人大碟外，更希望能踏足影壇：「早前曾參與過一部電影，我想有多啲機會拍戲，希望會有一個代表作！」
文：冰奇