吳日言街頭開工玩到癲

Yan日前聯同DJ Leo拍節目，兩人換上熊貓裝束在鬧市與市民玩遊戲，大派笑蛋，外形矚目的二人更引來大批途人駐足圍觀，他倆於街頭邀請多位途人參加遊戲，不過並非個個受落，有些途人被嚇至「走夾唔抖」，有些途人則冷言相向，甚至以粗口對待。

阿Yan坦言起初亦會感到不開心及尷尬：「開頭會唔開心同覺得難堪，但知道佢哋唔係有心。之後我學識要放低自己藝人同女仔嘅身份，唔好太執着他人說話，做好自己嘅角色。」

嘗試跳海

拍攝當日雖然秋風送爽，但穿上熊貓衫仍打三層底的阿Yan亦熱到不停流汗；反觀Leo就非常大膽，並笑言熊貓衫底下其實「真空」，沒有穿上內褲。每集他們均會換上不同造型，並說每次最期待的並非造型上的改變，反而是大懲罰環節，他們說：「我哋試過錫田雞，又試過舔車胎，真係玩到好癲！」

本以為這已是阿Yan的底線，但她竟表示可以「再激啲」，她說：「我接受到呀！下次我哋嘅大懲罰可以試吓去跳海，不過要安全至上，去泳池先跳，哈哈！」而Leo就表示希望能藉着節目帶給大家正能量，笑個痛快。