千嬅邊做邊造生B零壓力
楊千嬅老公丁子高恨生仔恨到出晒口，但婚後的千嬅忙個不停，從未想過停工生B的她，認為自己與一般女性無異，只需前四後六，對於生仔她沒有壓力，忠於自己的生活節奏，她說：「有咪有囉，冇咪冇囉。」
結婚兩年的千嬅忙足兩年，又電影又演唱會，計劃明年停工好好休息，有指是趕住與老公全力造人？千嬅坦白說：「我冇諗過停工生BB，可能啲人覺得藝人要抖下先生到，其實72個行業，所有女性都係返工有咗，咪攞前四後六，我助手都係咁o架，唔會無端端停工去試。」雖然經常被追問生仔，但千嬅坦言未感壓力：「我個人又唔係好聽人講，都係忠於自己生活節奏。」
千嬅手頭上還有兩部電影，又要舉行個唱，坦言覺得好攰要真正休息，她說：「休息唔係為生仔，有就有，冇就冇囉。」她承認年紀大，要好好保養身體機能，婚後盡可能抽時間做運動，強身健體。
個唱選冷歌
下月將在Star Hall舉行五場演唱會，千嬅講明不會唱大熱、主打歌曲：「只唱sidetrack嘅歌，費事觀眾入錯場，如果諗住聽《少女的祈禱》、《小城大事》，《可惜我是水瓶座》係冇嘅，肯定唔會唱。」這個以滄海遺珠歌曲做主的構思是千嬅的心願，雖然場地較細，但製作一絲不苟，她更是首個在Star Hall搭建四面台：「製作費都係咁多冇得慳，呢樣我好堅持，你賣飛畀人唔可以平，我過唔到自己，（咁你歌酬呢？）收嘅價梗係同紅館一樣，你都係要唱咁多隻，唔通細力啲唱呀，依家通貨膨脹，菜心都貴咗四蚊斤啦！」這個丁師奶果然數口精。
文：音樂組 攝：吳文聰
makeup：Ling Chan@ZING the Makeup School
Hair：vic kwan@II hair & Nail
服裝：Isabel Marant@IT
場地：Racks billiards club:mdb