陳嘉桓壁虎功苦撐幾粒鐘

陳嘉桓在新片《競雄女俠——秋瑾》中飾演一名啞巴，演技備受考驗之餘，體能上亦挑戰個人極限，其中一場戲需要用壁虎功在兩道牆中間支撐，雖然腰部有威吔，但嘉桓仍感到好驚，她說：「自己一直撐住唔敢放鬆，有武師話有威吔其實可以放鬆，但因條威吔在腰間，束得好緊，我連午飯都唔食，怕會嘔番出來，我最長一次試過幾小時支撐喺兩道牆之間。」

靠身體語言演繹

陳嘉桓坦言今次飾演啞巴是挑戰個人演技，她指過往演出可以透過對白來表達感情，但今次只能靠身體語言和眼神演繹，拍攝初期感到很困難，她說：「對我嚟講係一個考驗，但換轉諗我作為一個新人，有一個咁好嘅機會畀我去學習，要好好珍惜和把握做到最好。」

戲中陳嘉桓飾演啞巴，演技備受考驗。

陳嘉桓表示有興趣向多方面發展。

她笑言拍攝時曾經有蝦碌，一時緊張開了口說話，導演無奈喊NG，令她感到相當尷尬，她說：「因為不可以出聲，要更加留意對手的細微動作，又唔可以叫佢重複講多次，所以拍攝時要更專心。」

被黃奕演出感動

陳嘉桓指原本在開拍前去視察和學習基本手語配合演出，但導演指秋瑾年代仍未有手語，故只能打消念頭在戲中自行發揮。

今次與內地演員黃奕再度合作，嘉桓感到對方相當專業，她說：「其中一場戲佢需要喊住離開我哋，睇住佢全程一邊喊一邊演出相當自如，我都被佢演出所感動。」

文：影視組

場地、服裝：Collect Point