高海寧再露峰芒拋窒法拉
今年「視后」熱門陳法拉昨日以密實打扮出席剪綵活動，但卻遭同樣是港姐出身的高海寧、徐子珊和陳庭欣「拋胸」圍攻，風頭被搶的陳法拉難得大方說：「知高海寧嚟，費事大波撞細波啦。」
陳法拉、徐子珊、高海寧和陳庭欣昨日「胸」群而出，到尖沙咀出席名店剪綵活動。四美吸引大批龍友阻塞馬路獵艷，有大陸客更博亂愈影愈埋，其後驚動警察到場維持秩序，疏道交通。近期將「咪咪」收收埋埋的高海寧再顯「咪神」本色，以低胸tube dress，帶領穿上低胸裝的陳庭欣及「谷胸」的徐子珊，齊齊拋胸夾擊視后大熱陳法拉。
「攞豬肉獎都好」
「輸波」的陳法拉則風趣說：「計啱咗，知高海寧嚟，費事大波撞細波啦，我只係好普通嘅size。」視后熱門的法拉有被杏兒趕上之勢，她說：「入圍有提名都好開心，冇乜太大期望，攞到個『豬肉獎』、『牛肉獎』都好啦，杏兒今年表現都好好。」
有傳佘詩曼拉隊離無綫，與阿佘有聯繫的法拉則說：「同阿佘係朋友間聯絡，佢冇講過呢啲嘢。佢依家好似去咗內蒙咁遠拍嘢，證明有實力有演技，去到邊都唔驚，會以阿佘呢位師姐做目標。」徐子珊亦不相信阿佘拉隊離無綫，認為是炒作新聞。
成日暈驚有隱疾
高海寧近期在微博透露在家暈倒多次，呼吸又見急促，她說：「可能係減肥食少咗嘢，父母都好擔心，遲啲都會做檢查，唔知有咩隱疾。」對於再以性感打扮示人，高海寧說：「呢排成日畀人話我只係騷背脊，今日剪綵隆重場合咪騷番少少，酬勞都好滿意。」
她又強調傳緋聞的旅行社太子不是她的男朋友，對方只是朋友間慰問病情。
文：影視組