關之琳晒長腿血拼1粒鐘
圈中女星近日趁換季紛紛外出掃秋冬新裝，就連大美人關之琳（之之）前日亦出動，現身銅鑼灣血拼！穿短裙大晒長腿的之之試了十多件心頭好，揀足一小時才捨得收手。反觀於中環掃貨的熊黛林，於名店穿梭一輪卻冇斬獲。
新一季秋冬新裝出爐，貪靚的女星名模亦急趕掃新裝。近年養尊處優的之之，前日傍晚七時許，由司機接載下前往銅鑼灣掃貨。之之下車後邊行邊玩電話步往附近一名店，見她甫入店內即與店員打招呼，似乎是熟客。
見記者即匿埋
其後之之專心挑選心頭好，但當她發現記者在場時，即躲於一旁避鏡頭。之後職員拿了十多套新裝給她往試身室試穿，之之足足逗留了約一小時才捨得收手，滿載而歸。抽着戰利品步出、大晒長腿、腳踏今季大熱蟒蛇皮platform shoes的之之，被問換季掃新裝時，只笑而不答急步上車離開。
熊黛林冇斬獲
同樣趁換季一心掃新裝的熊黛林，前日下午約五時，於助手陪同到中環行街。一身悉心打扮的她於該處名店穿梭一輪，期間見她頻頻拿着新裝與助手研究，但左揀右揀後，最終卻兩手空空離開。熊黛林其後發現記者拍照，即友善揮手打招呼。問到為何沒有斬獲？她說：「諗住行吓街，但係都揀唔啱心水。」說罷即與助手步行往的士站等車走人。此外，Rosemary前日亦現身中環，她表示剛剛在附近出席完活動。
文、攝：追蹤組