JC絞盡腦汁為淫照解畫

JC近期可謂頭頭碰着黑，繼捲入盜竊案後又傳出有人向傳媒兜售疑似JC的淫照，惟她對事件一直未有正面回應。

或在微博交代

昨日記者致電其經理人Christine，問JC會否就淫照事件回港作回應？Christine說：「JC依家仲喺台灣拍戲，下月初或中先完成，佢都好想出來交代，但佢太忙，精神狀態未處理好，亦冇時間諗點解釋，佢都有諗過抽一、兩日回應交代，但未度到時間，可能呢兩日睇吓可唔可以喺微博有少少交代。（有網站發起一人一元買JC的淫照？）當大家講笑。」

疑似淫照爆出JC情緒備受影響，Christine指JC聽到件事都有喊，心情激動及不開心：「一個星期內發生咁多事，後來冷靜落嚟就好啲，但心情仲好起伏，我哋都唔敢問太多，以免影響佢拍戲。好彩又冇影響，佢好專業，唔想劇組失望，亦唔想表現得咁脆弱，反而更努力，仲叫助手若有做錯或唔好嘅地方要即時提示。」

工作未受影響

Christine又說淫照事件後，JC的工作有少少受影響，此期間因為要拍戲，之前沒有特別接job：「除咗有啲活動，之前hold咗個期，依家取消咗，但廣告同電影就冇影響。」Christine之後又透過短訊補充，對有人為錢而以這種手法傷害JC及其家人，感到震驚。對日前日模田代麻衣指JC可能遭日本公司解約一事，她亦澄清說：「佢兩年前來港發展時已再冇續約日本經理人公司，根本唔存在解約問題。希望局外人不要加插不實意見。」

文：名人組