祥仔：做蝦兵好hurt
「發哥」周潤發是無綫青訓產品，也是這家「兵工廠」得意之作。因為發哥珠玉在前，誘發有志入行者無限遐想，黎耀祥便是其中一個，但經過訓練班這條木人巷洗禮，躊躇滿志的祥仔竟然僅獲派遣做冇對白的蝦兵，令他十分氣餒。
回想訓練班學做戲已經係廿幾年前嘅事，你問我點解想做演員？除咗真係好鍾意演戲之餘，當然都想好似發哥咁大紅大紫。點知訓練班一出嚟，我唔suppose要做主角，但點都估唔到連一句對白都冇，係氣餒，不過冇辦法。
偷吳楚帆龍眼
我記得第一套演嘅劇係古裝劇，劇名叫《真命天子》，我呢啲做茄哩啡嘅當然要企喺藍天叔等主角後面，主角喺前面殺呀殺，我哋就做一個冇對白，淨係識得跳嘅蝦兵，真係幾hurt同戇居，真唔知自己做緊乜。
諗番喺訓練班嘅日子真係幾好笑，其實我讀嘅唔係訓練班，當時係叫進修班，我屬於第三期，同期有落選港姐，total有12人。你知啦，後生仔女好百厭，再加上為食，咁啱我哋上堂嘅地方隔籬係吳楚帆嘅大宅，佢種咗好多龍眼樹，我哋就鈎龍眼食消暑，諗起都過癮。
關寶慧撞到嘢
好多人話電視城搬去邊都咁邪，我讀訓練班時touch wood都未遇過，不過拍《大頭綠衣鬥殭屍》時，地點係清水灣第六場地，關寶慧喺車瞓覺，突然間見佢跑出車外，面青口唇白咁講唔到嘢，問佢發生乜事又唔講，成個人呆咗，猛話好驚好驚，當時大家都覺得佢見到嘢。又過兩日，佢先同我哋講番話撞到嘢，猛話好邪，仲叫我哋小心，都咪話唔驚。
口述：黎耀祥 筆錄：專案組