江若琳被馬踢大髀標淚入院
江若琳近日可謂頭頭碰着黑！繼早前拍戲遭啞鈴壓傷腰後，前日她在內地拍劇時又遭馬匹「大腳趷起」踢傷大髀，即時留下「馬蹄形」烙印。大腿腫如豬蹄，當場痛得眼淚狂標的江若琳在工作人員陪同入院求醫，幸無大礙可今日復工。
身處敦煌拍攝內地劇《巾幗大將軍》的江若琳（Elanne），前日開工時發生意外。事緣首度與馬匹合作的Elanne，拍攝期間因在近距離下背着馬匹講對白，在無為意的情況下慘遭馬匹「起飛腳」而釀成今次意外。
今日可開工
Elanne昨日接受長途電話訪問時說：「其實冇乜大礙，大家唔使咁擔心。只係因為我一時冇為意，隻馬用pat pat向住我都唔知，就係咁畀佢好用力咁踢咗一吓大髀，即時腫晒，就係咁仲留低咗個馬蹄印添！」
其實Elanne早前拍攝電影《高舉愛情》時亦遭啞鈴壓腰受傷，問到哪次較痛？她直認是今次：「啲工作人員話因為馬嘅爆發力好犀利，踢落嚟成幾百磅力，好痛。」Elanne自言一直咬緊牙關死忍，但最終仍抵不了劇痛而眼淚直流。她又指意外發生後，劇組已即時陪她到醫院，幸經醫生診斷後證實無大礙，休息三、四日便可康復。她謂：「劇組好好，特登畀我今日（昨日）休息，但我聽日（今日）已經可以開工，只係動作戲遲啲先拍。」
導演讚堅強
另外，《巾》劇導演田有良亦有在微博上載Elanne受傷的照片，照片中的Elanne痛至倒在地上，露出強忍痛楚表情，難怪獲田有良大讚她像劇中角色花木蘭一樣堅強。
文：影視組