黎耀祥：偷食個個男人都想
好男人難做，圈中的好男人更加難做。黎耀祥與太太Julia結婚十五年，一直掛住好男人這個金漆招牌，但面對各式誘惑，祥仔誠言：「偷食個個男人或多或少都想！」但花花世界下，暗藏糖衣毒藥，他知道一刻快感隨時賠上事業家庭，既然當下要風得風，為何犯險做傻事呢？有關祥仔的心路歷程，一連五日會向讀者披露。
霆鋒同栢芝搞到咁僵，真係令人好無奈，但佢哋關係變差，其實大家一早已估得到。做得呢一行，身心都唔同一般人，要維繫婚姻就更加難，因為太多人參與。為免找自己麻煩，所以我選擇搵一個圈外人做老婆，咁會較容易令感情保鮮。
畀老婆話晒事
我好欣賞一對super star結合而活得幸福，但事實證明總有另一半會慢慢淡出，遷就另一個，永遠唔會有一對超級巨星夫婦可以紅一世，又可以恩愛到暈。因為健康嘅感情，必然係一凹一凸，由一個去遷就另一個，呢啲就係宿命。霆鋒同栢芝亦唔係異數，佢哋咁後生，仲要係咁top，兩個都係super star，但兩個都係凸，太容易火星撞地球，只要個計時炸彈一爆，就一發不可收拾。同外國例子一樣，究竟有邊對巨星夫婦可以一直走到尾呢？如果係我，自己未必做到。
同太太結婚15年，我承認係一個凹男，亦係一個忍讓男。點解？因為覺得男人彈性大啲，加上自己係一個冇所謂嘅人，咪畀太太話事囉，認下低威做衰仔真係冇所謂，總好過為一次嗌交，令雙方感情出現裂痕，世上冇整容技術可以修補呢條裂痕。所以我盡量唔會同老婆嗌交，錫老婆會發達，我知架！
一次誘惑都冇
有人問過我結婚咁耐，有冇試過偷食。我真係唔敢諗，依家狗仔隊太過犀利，喺呢個圈咁耐，明白到我呢類演員形象係幾咁重要，如果偷食同行差踏錯，分分鐘要賠上一生代價。其實偷食個個男人或多或少都想，但只要諗到行差一步，就只係呢一步就會失去事業、老婆同個仔，婚外情只係剎那開心，開心完係咪同另一人結婚，又再遇上一個又會點呢？係惡性循環，我唔想因為一刻快感一鋪清袋，真係淆底架！
好奇怪，唔知係咪自己太過住家男人，近年真係一次誘惑都未遇過，異性緣係好，不過就射歪咗囉！哈哈！可能自己係一個悶蛋啦。仲好，咪做老婆嘅綿羊囉，聽聽話話都不錯呢！
口述：黎耀祥 筆錄：專案組