陳柏宇閃電初戀三日玩完
官恩娜（Ella）跟陳柏宇兩位在外國浸過鹹水的「ABC」，甫見面即滔滔不絕暢談異鄉的生活點滴，自爆「慌失失」失初吻的Ella，訪問中向陳柏宇進行大逼供，窮追猛打其初戀及初吻的發生經過，難得的是陳柏宇絕不忸怩和盤托出！
官：官恩娜 陳：陳柏宇
細訴「海龜」生活
官：你移咗民去加拿大，我又去過英國讀書，大家傾吓啲「海龜」趣事。
陳：咩「海龜」呀？
官：即係形容喺外國讀完書歸來嘅故事呀，我都係拍劇先知有呢個形容詞，我哋就係屬於嗰啲「海龜」喇！咁你幾多歲移民？
陳：七歲囉！嗰邊好悠閒，一去到加拿大，三年班開始唔做功課，因為佢哋都唔使我做嘅，冇人檢查你功課，直至有日唔知點解檢查，叫我返家做番，返到去死做爛做，但三年班仲學緊加減數。
搭巴士遭歧視
官：我記得過到去讀中學要計正方形體積，十三歲，我心諗咩事呀，點解要計呢啲，總之啲數學淺好多，淺到直情心諗「使乜聽啫」。感覺上加拿大種族可共融啲，但我以前讀書嘅地方唔係倫敦呢啲大城市，我記得搭巴士返學時有人蝦我。
陳：咁衰……邊個？你話畀我聽等我教訓佢！
官：係呀，記得有個白人媽咪拖住個小朋友，個小朋友仲向我吐口水，又有人當我怪物咁研究我，我自己一個人搭巴士，佢哋覺得我好怪好似諗緊︰「你睇吓，有個中國女仔喺度。」嗰時十三歲，但都覺得好驚。
陳：你自己一個過去讀書就更加慘。
官：我仲要自己一個人住閣樓，細個係聽朋友話嗰度啲學校好好所以跟佢去，咁嗰度讀書環境真係幾好，我讀嘅私立女校會保守啲，但返學時會撞到唔同學校嘅學生，成日撞到嗰班粗魯嘅男仔同女仔。
陳：有男仔撩，可能佢唔係歧視你，而係想識你，我好記得嗰時愈鍾意個女仔會扯佢頭髮、打佢隻手，想接近佢又想掂到佢，但又唔想佢知你關心佢。
官：咁咪令到個女仔更加唔鍾意你？
陳：係架，係好失敗嘅一件事！但嗰時唔會嘗試去追佢，只會暗戀佢。
自爆初吻過程
官：咁你嘅初戀係幾時？
陳：我嘅初戀係十四歲，個女仔同我同校，但佢低我一班，有次喺巴士上撞到佢，我知我哋係同學，但冇機會傾偈，之後永遠搭呢程巴士，有次喺巴士上鼓起勇氣同佢傾偈，跟住做咗朋友、交換電話，慢慢發展至拍拖，但只係拍拖三日。
官：咁短？咁有冇初吻架？
陳：冇！但喺我感覺裏面，第一次問對方可唔可以做我女朋友，女仔話可以，嗰種感覺已經係拍緊拖，但冇拖手又冇錫，只係一齊行，我又送佢返屋企。
官：咁點解分手？
陳：可能太細唔會識得去維繫段關係，但好多年之後我哋有復合，亦成功拍咗一排，今次有Kiss，發生喺十六、七歲左右，我哋去咗一間鬼屋玩，走嘅時候我拖住佢隻手，跟住呃佢嚟我屋企向佢表白，入到屋後我播咗張國榮嘅碟，又開住床頭燈，表白完之後我就瞓喺佢大髀上，佢就烏低頭錫咗我一啖，嗰次就係我哋嘅初吻，係佢主動錫我。
初戀男友強吻
官：我個初吻好慘架，因為唔知係初吻，諗番起其實係強吻，當時成班朋友喺屋企玩，當時嘅男朋友突然叫我行過去，就無端端咁錫我，我成個人呆咗，佢仲叫我擘大個口，我死都唔肯擘，死都黐實個嘴咬實啲牙，返到屋企喺門口淨係覺得好驚，根本冇意識想錫呢個人，就被人錫咗。
陳：初吻嗰個人係咪你初戀？
官：冇下文啦，我嗰時仲喺英國讀緊書，只係放暑假返嚟，所以唔可能同佢發展，不過依家諗番都好嬲，人哋有咁浪漫嘅初戀故事，我嗰啲就「彎」晒。
感情媲美姐弟
官：你係咪巨蟹座？巨蟹座好黐家。
陳：我同巨蟹座嘅人特別有緣分架！
官：我知，你以前有個女朋友係巨蟹座嘛！
陳：（思考一會兒）哦……我知你講邊個，諗死我，你想講裕美之嘛，我哋係好朋友，不過我同巨蟹座嘅人真係特別有緣分同close，唔單只係裕美，王浩信同埋幾個加拿大嘅朋友都係。
形象臭寸自大
官：我初初識你之前誤會過你，有啲「鬼頭仔」喺背後搞事。話說有次我去加拿大做嘢，嗰時你又啱啱入行，有個加拿大人同我講「陳柏宇好寸、好自大架」，到我識你時，就凝住陳柏宇個人好寸、好自大。
陳：唔緊要，我唔知就當冇發生。
官：後尾多啲機會接觸你，就發覺真實嘅你同我以為嘅你係一百八十度唔同，跟住就開始鍾意你，覺得你好可愛，唱歌好好聽，你係我香港其中一個最鍾意嘅男歌手，真係好鍾意聽你唱歌。
陳：嗰次你做一個歌唱比賽，雷頌德話你唱得好，畀佢搶咗我對白，你真人又靚又上鏡、又唱得好，咁但係從來喺我心目中，我對你傾慕但唔係想同你拍拖。
官：我知，因為你發夢見到我做你家姐……
陳：係呀，夢裏面我哋好似去食飯，而你直情係我家姐，唔係你一句說話令我覺得你係我家姐，而係個感覺。
官：你最初都係咁玩，成日叫我姐姐架啦！
陳：雖然你年紀大我少少，但個感覺好令我想尊重，好想去保護，但我唔「戀」你，係姐弟情。
採訪：倪小珊 攝影：吳文聰 髮型：Eve Chiu
場地：千鶴日本料理@都會海逸酒店