過去2年四大唱片跟無綫關係決裂，雙方互相杯葛，四大歌手絕迹無綫，連「十大勁歌金曲頒獎典禮」都冇得出席，紅如陳奕迅、李克勤、謝安琪、薛凱琪全部都捧蛋收場，無一幸免。
今次雙方即將破冰，四大歌手雖可重返無綫，惟未知能否趕及收回勁歌總選失地！事關12月11日舉行的「勁歌金曲第三回優秀選」將在11月25日截榜，就算四大歌手趕及尾班車有歌上榜，亦難以儲夠分數爭獎，除非無綫肯賣人情作特別幫忙，才能有機會讓四大歌手重回總選，壯大屆時出席的歌手陣容。