裕美谷底反彈 更堅更強
歌手裕美相隔三年後於日前推出新專輯，她坦言三年後的今日變得成熟堅強，承認曾擔心再踏上舞台會被不利新聞纏身及沒人給予機會，幸好機會接踵而來，令她鬆了一口氣兼大叫感恩。
裕美早前成功簽約美麗傳奇新經理人及唱片公司，並於日前推出新專輯，對於三年後再戰樂壇，她說：「個腦筋清晰咗，知自己做緊乜，以前會貪慕虛榮、冇乜主見、唔知自己鍾意乜，依家會覺得自己成熟同堅強咗，至少知道自己想要啲咩同做緊啲咩，開心過以前。」
諗嘢更積極
過去的戀情裕美說全是「玩玩吓」：「就係因為唔知自己做乜，所以成日換畫。」曾患抑鬱症的她坦言病情令她成長，她說：「諗嘢正面同積極咗，有時做人跌到落谷底，反而係會有好嘅幫助，不過我出番嚟唱歌都擔心會有謠言同唔好嘅新聞，唔知點見人，又驚冇人畀機會自己，不過係自己諗多咗，依家我做得好開心，同埋有好多機會，真係好感恩！」
送碟畀阿叻
裕美於02年參加歌唱比賽時認識當時做評審的陳百祥（阿叻），隨即成為潮音樂旗下藝人，雖然年前已與對方提前解約，但大時大節大家亦會見面食飯，問到有否送新碟給阿叻？裕美說：「想親手將唱片送到佢屋企，不過架車啱啱撞咗，遲啲一定送到畀佢。」
文：音樂組
髮型：Kelvin Chan@Hair Corner
服裝：suye
場地：Hair Corner