呂晶晶靠自己 拒富豪飯局
呂晶晶10月尾將會返大陸拍大陸劇《媽祖》，經常有大陸製作工作向她招手的晶晶，坦言之前為亞視拍劇而推了多套劇，白白不見了最少6位數字。她又坦言入行多年都有人問她飯局價，不過她坦言：「靠自己搵錢好過！」
亞姐呂晶晶現時與亞視只是簽部頭形式合約，繼早前拍下鄧特希監製的《親密損友》後，她與亞視暫時都沒有合作，有適合自己的工作，她才會接拍。近年，晶晶都不時往大陸拍劇搵真銀，10月尾，她將會到福建湄州島拍攝古裝神話劇集《媽祖》，劇中飾演第二女主角，亦是晶晶第二次拍古裝劇，她笑言最怕的是要吊威吔：「我未試過拍劇吊威吔，之前淨係拍一個洗頭水廣告時吊過一次，足足痛咗幾日！不過自己真係好鍾意拍古裝！其次我擔心嘅係10月尾時天氣會好凍，都叫咗助手同我度身訂造羽絨，我呢排專登減肥，都瘦咗好多，足足輕咗12磅，所以特別怕凍。」
去年，晶晶接了3部大陸劇，酬勞相當豐厚，今年因為之前要拍《親密損友》，故都推掉不少工作，損失最少6位數字酬勞，她謂：「估唔到套劇一拍拍咗5個月，據聞出年年頭會播映。」
四年來不停遭問價
另外，提到不少香港女星都曾被問價，晶晶不諱言入行時已有，起初有一位大年紀的男人致電給她，晶晶謂：「佢話叫我出去食飯，幾萬蚊夠唔夠，我話唔做呢啲嘢，佢仲問我係咪唔夠，叫我開個價，另外有一個女人，4年來每年都用唔同嘅電話打畀我，佢好留意我啲新聞，又話我同邊個分咗手，又話我蠢，仲話唔鍾意食飯，睇fashion show都得，佢問我見面禮幾十萬嘅手錶夠唔夠，我即刻話唔去，叫佢唔好再打嚟，你話我蠢都係咁話啦！佢先收手咋！」問晶晶幾十萬都不心郁嗎？她坦言：「返大陸拍多幾套劇，靠自己搵錢好過啦！」
文：影視組