子珊爛聲吳卓羲頂對白
今年在多部劇集重飛的徐子珊，雖然贏盡名利，但日以繼夜機械式開工下，身體終不勝負荷響起警號，早前連踩兩劇時爛聲又傷腰，幸得拍檔吳卓羲為她分擔對白，才得以順利拍攝。
無綫花旦近年買少見少，有見及此，高層們早已下令力捧第二梯隊上位，有幸成為其中的徐子珊，被安排於多部劇集孭重飛，屬多產演員之一，還未到年尾經已有5部劇集出街，曝光率爆燈，不過成功背後，子珊身體亦日漸變差。
山頭取景喊辛苦
已第5次演警察的子珊，今次於新劇《法證先鋒Ⅲ》終不用再當「散仔」，升呢為重案組高級警員，子珊笑指劇組不時於山頭取景，令她一度以為自己拍古裝劇，不過當時連踩兩劇的她，鏡頭前的確型到爆，鏡頭後卻多多病痛，她謂：「一開始就整親條腰，醫生話我係腰椎盤移位，我跌親都唔知，再加埋舊患，搞到要針灸，有一排好辛苦，化妝間去廠好遠， 結果要拐住行，仲要着高跟鞋喎！」
經常合作有默契
當腰傷稍有好轉，卻又病到聲沙沙，由於進度不能再拖，子珊即使帶住一把爛聲仍照拍可也，幸好拍檔卓羲肯捱義氣，為她分擔部分對白，她笑謂：「佢真係夠老友，見我成把男人聲又走晒音，雖然都有笑，但都有同導演商量，盡量叫我講少啲，所以觀眾如果睇到呢啲位，就請多多包涵。」
與吳卓羲合作過無數次的她，不諱言雙方太有默契，演繹時毋再花時間溝通，不過貪玩的卓羲，卻依然喜歡作弄她。
文：影視組 攝：林楠
服裝：BCBGMAXAZRIA
場地：Taku Japanese Restaurant