袁彌明狠插政府交行貨
政府昨日公布施政報告，復建居屋可算是港人最關心的一項，但不少人都不滿要等多年才興建，而且名額過少。當中袁彌明狠批政府交行貨，未能解決房屋問題。
房屋問題向來困擾港人，昨日施政報告出爐，在一片怨聲下，政府終決定復建居屋，但首批單位於2014年才預售，而且單位只得2,500個，不少藝人認為遠水不能救近火。當中已踩入政壇的女藝人袁彌明（Erica）更狠插政府交行貨：「樓價逼到埋身先做少少嘢，地產商半年就起完樓，唔明點解居屋要搞咁多年！而且份報告太籠統，唔夠實在。（畀幾分？）3、4分啦！佢都係做3、4分嘢！」暫時租樓的Erica無意買樓，因覺得政策未能幫助中產置業。
黃秋生嫌名額少
大半年前買入南區一手居屋的鍾舒漫自言好運，覺得新一批居屋名額太少，會供不應求：「我個單位差唔多200萬有三房兩廳，做到95%按揭，自己趕得切都算好好彩。當時唔知係咪會復建居屋，所以買咗先。」黃秋生則覺得遲到好過冇到：「2,500個係唔夠，不過頂住先啦！而且遲到好過冇到。」他認為香港炒風嚴重，但亦是維持經濟的重要支柱。
而準備「上車」的周永恒大呻復建居屋不合時：「2014年都唔係曾蔭權做特首，佢開咗牌頭就走，留低蘇州屎，到時樓市都唔知點！依家拖延咗我嘅買樓計劃，觀望期要再長啲。」現時住屋邨的性感女星黃榕被問會否考慮買居屋，她謂：「太耐喇！而且名額得咁少，一定爭崩頭，點輪到我？」
李思欣婚後租樓
對於復建居屋或令樓市下調，有藝人希望可趁機買樓。明年初跟范振鋒結婚的李思欣表示婚後會租樓過二人世界，等樓市下調才買樓。
文：影視組