甄子丹努力造人恨追多個
向來是愛妻號的甄子丹，昨日主持嬰兒車展覽的揭幕儀式，坦言一直有衝動再生BB，只是太太可能怕辛苦，又希望他成熟和乖一些才考慮。問到對姨仔汪圓圓的男友蔡加讚有何睇法？他就大讚對方乖仔，又笑稱對方正跟他學習如何做一名好老公。
愛妻號甄子丹、羅霖及李嘉慧等，昨日齊現身活動。甄子丹面對多款嬰兒車，被問到可有衝動再生BB？他坦言：「不嬲都想，但唔係一個人的事，唔知老婆呀，可能驚辛苦，又話等我成熟同乖啲先。（畀獎勵老婆？）多啲時間留喺屋企囉，之前半年假已經放完。（有冇好好珍惜假期造人？）耐唔耐都珍惜下。（一對仔女有冇話想要細佬妹？）都有問過，細佬要brother，家姐就話要sister。」
拍喜劇學志偉聲
甄子丹表示拍完手頭上的賀歲片後，會留港開另一套新戲，他笑言留港拍戲的好處是可以回家吃飯。他又直言拍喜劇需要更多energy，時刻保持很高漲的情緒，還要似曾志偉的聲線，所以要想很多東西來揣摩角色。
教加讚做好老公
另被問到對姨仔汪圓圓的男友蔡加讚有何看法？甄子丹就大讚對方夠乖和有為，並表示大家關係很好，有經常一起飯聚。對於汪圓圓是否跟男友好事近？他笑說：「未咁快，我同老婆係神速結婚，冇人快得過我哋。」他又笑指蔡加讚現正跟他學習如何做一名好老公。
文：名人組