胡杏兒捱眼瞓碌上雲霄
胡杏兒及張智霖等昨日凌晨捱眼瞓到機場，拍攝劇集《衝上雲霄Ⅱ》巡禮片段。演傷殘人士的杏兒坐上輪椅即high爆「起舞」，碌前碌後技巧純熟。
以飛機師為主題的劇集《衝上雲霄》○三年播出叫好叫座，無綫有意明年開拍續集，張智霖、胡杏兒、吳卓羲及港姐朱晨麗等昨日凌晨先後到機場，捱眼瞓拍《衝Ⅱ》巡禮片段。
朱晨麗緊張爆燈
上集有份主演的杏兒表示仍未收到劇本，故未知是否延續篇。坐輪椅飾演傷殘地勤人員的她控制輪椅時甚為純熟，更high爆移前移後又轉圈「起舞」。她說：「之前跳過輪椅舞，所以都控制到，演傷殘人士都係挑戰，心路歷程唔同啲。」她表示希望首集「情人」吳鎮宇出山再演，再跟對方學嘢，但笑言沒有對方電話號碼。至於杏兒緋聞男友黃宗澤則於兩小時後才現身，兩人未有同場。
吳卓羲亦想原班人馬拍續集：「有七、八成人都好，想鎮宇返嚟，佢好有號召力。至於陳慧珊同陳鍵鋒就未必再演。（可惜？）上次S4好成功，相信今次有新人都一樣有新火花。」現場卓羲與朱晨麗拍攝分手戲份，第一次拍巡禮的朱晨麗坦言緊張爆燈，即使只得一句對白已令她「食唔落飯」。
張智霖未決定拍
另外，盛傳張智霖以每集八萬高價拍《衝Ⅱ》，他對此笑說：「邊止咁少！不過未決定拍唔拍，睇咗劇本先！（咁夜開工喎！）平時我都盡量避，但如果真係接就唔會計較。」至於MC Jin則化身「機師Jin」，與翟威廉及周志康等「年輕機師」拍攝第一次飛航前興奮的掟帽戲。
文：影視組
攝：林楠