陳偉霆10年長征超越阿Sa

早前有傳William和阿Sa因聚少離多而情海翻波，其實兩人都很珍惜相處時光，感情有增無減，William接受本報專訪時，對女友有讚無彈：「佢係一個極度好嘅女朋友，絕對冇公主病，又好慳家，唔崇尚名牌，我哋去餐廳食飯都會格價o架。」

陳偉霆以短訊向阿Sa示愛，他坦言等回覆期間非常緊張。	陳偉霆與阿Sa拍拖一年，從未吵過架。	陳偉霆十分珍惜與阿Sa相處的每一刻。

大男人爭畀錢

William坦言跟阿Sa拍拖以來從沒有吵架，只是外間拿兩人事業比較，令他有點不是味兒：「有人覺得佢紅過我，賺錢多過我，咁講對我好唔公平，好似封殺咗我嘅後路。我依家至25歲，如果35歲仲係咁無話可說，希望大家畀我10年時間，其實我幾大男人，每次約會都係我畀錢，我覺得呢啲係紳士表現。」

很多人都覺得阿Sa難追，原來William的取勝招數是實而不華：「愛情好講timing，喺適合時間遇到適合嘅人，好自然就一齊，求愛經過同普通人冇分別，因為大家好少時間見，所以我係用短訊示愛，等佢回覆嘅時候好緊張，等到佢答應真係好興奮。」不過，雖然兩人公開了戀情，卻依然成為狗仔隊追訪對象，令兩人煩惱不已，希望傳媒能給他們私人空間，好好享受拍拖。

採訪：音樂組

場地：千鶴日本餐廳@都會海逸酒店

化妝：Khaki

髮型：Davy Yu@Chin G.