朱晨麗唔顧身世摷袋煲粥
應屆港姐冠軍朱晨麗日前在九龍塘出席完活動，慳家乘港鐵往尖沙咀途中，每當在月台轉車時，企唔夠一分鐘就要搵櫈坐低，起勢摷袋兼狂煲電話粥，完全未有顧及港姐應有的高貴身份。
作為藝人就要顧及自己的言行舉止，更何況是高貴形象的香港小姐！日前下午二時許，應屆出爐港姐冠軍朱晨麗在九龍塘出席完活動，由助手陪同下先到附近時裝店還衫，順便換便服。
之後朱晨麗獨自步行到港鐵站，沿途不停講電話。當到達港鐵站後，她即行埋牆邊，並以右腳大髀頂着紙袋，再從手袋拿出另一部電話查看兼整理隨身物品，手腳並用的她幾經辛苦才取出八達通入閘，極度狼狽。
約許亦妮行街
進入月台後，她企唔夠一分鐘又搵位坐低繼續煲電話粥，懶理與陌生人一齊坐，直至列車駛至才捨得起身上車，然後往油麻地站轉車往尖沙咀會合友人。當步出列車後，她又再搵位摷袋，摷完一輪又再講電話，口水多過茶，完全忘記港姐應有的儀態。
早前有指朱晨麗聯同亞軍朱希敏杯葛季軍許亦妮，但日前三女於銅鑼灣工作後相約行街，期間見朱晨麗與許亦妮特別好傾，十分老友，以行動粉碎不和傳言。
另外，朱晨麗昨日與王賢誌出席籌款活動，有傳她獲公司力捧，擔任電影《LAUGHING GOR之潛罪犯》女主角。朱晨麗表示暫時未知詳情，若有機會會好好把握。有指她貌似陳法拉才獲選女主角，她笑言：「我希望觀眾會認識我係朱晨麗，而唔係邊個嘅翻版！」
文：追蹤組