李玟過億婚宴預埋籮霸
即將結束八年愛情長跑、於本月底結婚的樂壇天后李玟（CoCo），將豪花過億港元在港大搞一連兩日的婚禮派對，並邀得荷里活女星「籮霸」珍妮花露柏絲來港贈興外，據知美國樂壇天后Rihanna屆時也來港為一對新人獻唱。昨晚CoCo和未婚夫對於嘉賓名單口徑一致採取封嘴態度，但就未有否認籮霸來港出席婚宴。
昨晚CoCo和未婚夫Bruce Rockowitz雙雙出席活動，同場更有丁子高、袁潔瑩及恒生新抱何倍倩等。CoCo表示待嫁心情興奮，更於前晚開始失眠，因自己有很多想法，想令婚禮辦得難忘及好玩。對於有傳豪花過千萬美元即過億港元大搞婚禮，CoCo說：「冇提到，大家唔會講用咗幾多錢，最緊要玩得開心！」她續說會有玩新郎及有中式環節，伴娘裙由設計師何國鉦操刀外，更言自己其中一條裙是Vera Wang設計。「我一見到件婚紗好想喊，因為冇諗過自己真係會結婚！真係夢想成真！」她續說老公兩個分別13及16歲的女兒會擔任伴娘。
Rihanna獻唱
是次婚禮及婚宴，於27及28日分別在「天際100」及邵氏影城舉行，人緣甚廣的CoCo和Bruce邀請了不少重量級的巨星好友出席，當中包括荷里活女星「籮霸」珍妮花露柏絲，以及於08年親自來港為Bruce的50歲生日派對中獻唱的美國樂壇天后Rihanna，據知Rihanna是次來港親自祝福一對新人外，更會即場獻唱！問到籮霸來港出席婚宴一事，CoCo和Bruce口徑一致齊聲說：「唔知！」但卻未有直接否認！CoCo補充說：「呢輪好多新聞，係有nice嘅人會嚟，但當中有啲係誇張咗。依家想保持神秘感，到時有紅地氈大家會知！」
另外，同場的袁潔瑩表示和一位針灸師合作搞針灸美容院，「我想話畀大家聽我唔係冇嘢做，依家公司收支平衡，初時我都想讀針灸，但後來發現唔容易，落針要好準！」
文：名人組