莊思敏拒翻撻說謊男
男未婚女未嫁，社交圈status又轉回單身，林忠豪和莊思敏這對甩拖男女好襯！在這個色慾都市，少點進取隨時筍盤落空，如今莊思敏蓄勢待發，重新投入戀愛市場，把吳浩康（Deep）這個人delete，因為她不再相信對方，反而對林忠豪卻有好評價，單是一句：「林忠豪的確好gentleman！有事業心！」Deep想翻撻？難矣！
有權選擇date邊個
當single遇上single，再沒有偷食的危險，這是UFO年代，男歡女愛好正常，莊思敏與林忠豪傳緋聞，絕不令人驚訝，唯一慌張的，可能只有廖碧兒。
兩個人喺埋一齊，我從來都唔會睇背景，Deep亦然！其實我同林忠豪識咗十幾年，不嬲都係好朋友，只係近呢兩個月大家回復單身，所以多咗聯絡！你問我林忠豪係一個點樣嘅人？講真，佢真係幾好，份人好nice，好gentleman，加上我向來都鍾意事業心重嘅男仔，佢就正正係呢種人。
依家大家都係single，出嚟傾偈自然會多，唔係因為佢係林忠豪，而係single有權去選擇出嚟約邊個。我唔敢講自己對佢有冇feel，但我可以講大家未去到嗰個階段，彼此仍然只係朋友。
一次不忠百次不容
很多男人喜歡用大話去掩飾秘密，在莊思敏心目中，無論大話是善意或惡意，一次不忠百次不容，只要是謊言，她都不會接受！
我同Deep相處係有問題，我哋生活上有太多習慣唔同，完全唔關第三者事，係好多嘢堆埋一齊，導致大家再不能夠喺埋一齊。我哋分手係冇一件實質導火線，但彼此相處真係有太多沙石喇，最終去到不可挽救嘅地步。
講真，分手後佢係有追番我，仲有不時SMS我，許下一啲以前做唔到嘅承諾，佢承諾自己會做得更加好，去解決以往嘅問題。但我哋拍拖咁多年，太了解對方喇，呢個moment我唔會咁易再信番佢。係，係誠信問題，我好唔鍾意你hurt咗我之後講大話去解釋，而點解唔係喺hurt我之前就唔做傷我嘅事，係觀點與角度問題。我係一個好唔鍾意人講大話嘅人，咁會令我好冇安全感。不過我都唔好得去邊，成日要知道對方行蹤，絕對唔可以容忍啲人為咗小事講大話，你唔好明明同A食飯，就話同B一齊，我完全接受唔到。
信有緣 唔驚做剩女
門當戶對？對含着金鎖匙出世的莊思敏來說，從來都no big deal。在她的字典中，愛情只需有感覺，青蛙都可以變王子。
係，我同Deep背景的確唔同，一開始拍拖被人指指點點，的確好唔開心，大家都好尷尬呢啲說話。但隨着時間慢慢沖淡流言蜚語，大家都習慣。成日有人話我係一個大脾氣嘅港女，其實我做衰人真係冇所謂，大家信我又好，唔信我又好，no big deal，最緊要係身邊人知我係乜嘢人。我唔係一個需要竹門對竹門嘅人，家人從來都知，所以我哋分手，佢哋都冇指指點點，畀太多意見，佢哋都覺得由我自己去處理最適合。
近排好多人閃婚，依家我已踏入適婚年齡，加上又單身，真係好容易畀人話係剩女。但我唔驚囉，唔驚唔代表唔會發生，我係一個工作狂，可以令到自己生活好充實，我相信緣分，又相信自己嘅感覺，只要我鍾意，隨時都可以拍拖，甚至結婚。所以依家都盡量保持最佳狀態，一路Keep住靚！
短訊挖角冇誠意
無綫四面楚歌，身為無綫人的莊思敏未驚過。對，她已收王維基的邀請短訊，到底意下如何？她逐一剖白。
我係一個好鍾意講嘢嘅人，除咗model工作，真係好想往司儀界發展。明年電視圈大戰，反而覺得有危先有機，係一個好好嘅機會表現一下自己。老實講，我都有收過王維基短訊，同大家收嘅一樣，個人認為好冇誠意囉，幾隻字唔代表啲乜，似係宣傳策略多啲！
講番模特兒工作，作為一個專業model，我真係唔想o靚模last得耐，真係唔希望再見到佢哋。以前做模特兒係有一個標準，要有高度、儀態、識行天橋。但自從有o靚模出現，原來畀龍友影過相都可以做model，好唔健康，我唔認為香港會再有一個周秀娜！
後記：
這些年，單身代表生活苦悶；2011年，單身代表大把貨有得你揀。莊思敏2011年回復單身，這兩小時的訪問中，粗略估計有20個電話找她，亦有N個短訊等待她回覆。小記八卦，聽到電話筒傳來都是男人聲，問她追求者有否一打？她笑說：「冇！只有半打！」
口述：莊思敏
筆錄：阿霆
攝影：劉智源
服裝：Miss Sixty
場地：ifc