天華法拉聯手爭帝后
螢幕情侶檔對藝人來說搵到錢又有噱頭，陳豪、陳茵媺便是好例子，憑《潛行狙擊》而熱爆的謝天華和陳法拉，除因情侶檔接Job接到手軟外，天華還寄望憑二人聲勢可奪今屆視帝、視后，不讓有五倍半信心的視帝候選人黎耀祥專美。
謝天華、陳法拉、吳卓羲、胡杏兒和徐子珊昨晨齊出發到雲頂登台開演唱會。天華最近四出登台，遠至大陸偏遠地方都是搵錢之地。雖然法拉現時正忙於拍攝新劇《東西宮略》，但之前二人都有機會到內地剪綵搵銀，問二人以情侶檔出席是否酬勞倍升時？天華說：「當然兩個人出現酬勞理想啲，不過法拉開工啲期都好難就，（畀陳豪、陳茵媺搶晒啲情侶檔工作？）唔係嘅！法拉間唔中都度到期，不過有啲夜晚show就我自己一個接，其實內地好多遠啲地方都搵我哋工作，諗唔到《潛》劇影響咁遠。」
法拉仲有進步
提到黎耀祥攞視帝信心大增，更希望與張可頤憑台慶劇《法證先鋒III》齊齊封帝、后，對此，天華坦言都希望與法拉可以憑《潛行狙擊》齊齊奪獎，他說：「劇中我哋演一對，梗係想一齊攞，呢個好自然，（有冇信心攞埋最佳劇集？）真係要睇埋今年出街嘅劇先可下評論，暫時套劇係今年收視之冠，希望可keep住優勢。」說到視后獎項，法拉謙稱：「我對天華攞視帝好有信心，我自己就可以遲少少先，仲有進步空間，依家仲係學習階段。」
杏兒單拖獻歌
胡杏兒單拖上陣，問為何不預埋黃宗澤以情侶檔為雲頂fans獻唱時，她笑言：「我咪型囉，獨立女性嘛，事業型幾好！」杏兒坦言因趕為《換樂無窮》埋尾，只睡了一陣便來機場，她笑謂：「我都覺得自己太勤力，好似工廠女工咁，返嚟又要即刻開《怒火街頭II》，（冇得同Bosco去旅行？）冇啦！食飯、見面都冇時間，只可在公司見。」此外，緋聞男女卓羲、子珊坦言會合唱《小酒窩》，對於緋聞女友張馨予於微博上的留言，他表示不回應。
文、攝：影視組