陳山聰公開認錯 伍詠薇唔受

伍姑娘日前在微博留言祝賀山聰的35歲牛一，豈料不到五小時就刪除留言，更留言稱：「一友人打來叫我以後不要再找他！」令她氣上心頭，更向對方講永別正式斷交，期間她取消關注契細佬陳山聰的微博，加上陳敏之安慰留言說：「有些人已被金錢沖昏了頭腦！」

嘗試解釋無法聯絡

事隔五日，山聰昨日接受查小欣電台節目《巴巴閉邊個夠我查篤撐》的電話訪問，公開承認伍姑娘口中所指的「友人」正是自己，又詳細講述事發經過，聲稱一切都是因為飲醉所致，他表示：「當日我同幾個圈外朋友慶祝生日，飲酒飲醉咗，同班人玩Truth or Dare（遊戲），點知我輸咗，就罰我打畀一個朋友要講絕交，我即時諗起最玩得嘅就係伍姑娘，我打畀佢第一句就話：『你以後唔好再搵我喇！』，之後佢答我一句：『好呀！』就即刻cut咗線，我之後再打番畀佢，就已經再冇聽我電話！」山聰表示翌日睇到微博及本報的報道後，先知道事態嚴重，但事後多次嘗試致電對方解釋，可惜都聯絡不上，他補充說：「諗住過兩日搵佢，但佢都冇回覆，以為同佢識咗八、九年，大家都好玩得，點知原來出咗事！所以我想公開向伍姑娘講對唔住！」

當主持人問到山聰是否跟超雲拍拖後，要承受很多外界的閒言閒語？他表示：「每個人都有唔同諗法，我都尊重，超雲都好支持我，其實預咗畀人講，（好冤屈？）唔係冤屈嘅，係好大壓力，我其實同一般人一樣好努力咁工作，好多嘢好難逐一解釋，只好接受評論！」山聰表示無綫對於他跟伍姑娘鬧翻的事沒有加插意見，但希望可以妥善處理，他又稱雖然同樣收到挖角的短訊，但沒有離開的念頭。

一頭霧水不作回應

本報致電伍姑娘，對於山聰的解釋，她只冷淡表示：「冇回應，總之我就一頭霧水！（接受佢道歉？）唔回應！」伍姑娘對事件大感痛心，曾經以巴士論及友情，她說：「有啲人可能若干年後會再上番車，但佢唔會再上車，因為我唔會再開巴士門畀佢！」伍姑娘雖然未有多講，但對於網友的議論紛紛，伍姑娘只以三舊白雲作回應，未知是否代表兩人的友情關係有如浮雲來去匆匆？

採訪：音樂組